Tað er nú endaliga greitt, at, at havnin á Drelnesi verður oljuhavn, um tað nakrantíð kemur so langt.
Herfyri skrivaði Tvøroyrar Býráð nevniliga undir eina avtalu, sum gevur einum oljuútgerðarfelag rætt til at leiga havnaøkið á Drelnesi, um ein oljuvinna tekur seg upp, sum hetta sama felag verður uppi í.
Tað er felagið Norserv, sum Tvøroyrar kommuna nú hevur skrivað undir avtalu við um havnina á Drelnesi.
Norserv er eitt føroyskt-danskt felag, sum Danbor, ið er dótturfelag hjá donsku risafyritøkuni, A.P. Møller, hevur stovnað, saman við føroyingum.
Tað er Henrik Thomsen á Tvøroyri, sum umboðar føroysku áhugamálini í felagnum.
Annars verður tað Steen Hansen frá Danbor Service, sum verður leiðari á nýggju oljuútgerðarhavnini.
Sostatt er tað greitt, at tekur ein oljuvinna seg upp, sum Danbor og Norserv verða uppí, verður teirra oljuhavn løgd á Drelnesi.
Vælegnað
Økið á Drelnesi er 27.940 fermetrar stórt. Og tað er ferð eftir ferð komið fram, at Suðuroyggin er sera vælegnað til oljuhavn, tí hagar er stytst at sigla av oljuleiðunum sunnanfyri Føroyar, og fjørðurin er avbera góður at koma inn á.
?Tað fer at spara oljufeløgunum einar seks tímar í siglingstíð at leggja oljuhavnina á Drelnesi afturímóti aðrastaðni í landinum og tað er rættiliga avgerðandi fyri oljufeløgini, sigur Dan Nielsen, býráðsformaður á Tvøroyri.
Hann sigur, at hetta sama var eisini fatanin hann fekk á oljustevnuni í Stavangri herfyri, har Tvøroyrar Kommuna var við, eins og felagið Norserv.
Dan Nielsen sigur, at ein partur av skránni var at vitja ymiskar fyritøkur, eitt nú varð vitjað á Statoil í Forus, har tað segðist at eini 6.000 fólk arbeiddu.
? Vit fingu eisini høvi at síggja tvær útgerðarhavnir, sum báðar eru í Sola, sum er vinarbýur hjá Tvøroyri.
?Sola kommuna er týðiliga merkt av, at hon fær stórar inntøkur frá oljuvinnuni. Har búgva upp ímóti 19.000 fólk og har sóu vit eitt stórt, sosialt byggjarí til eldri, rørslutarnað og onnur við serligum tørvi.
Har er eisini eitt stórt mentanarhús, sum liggur lítið aftanfyri okkara norðurlandahús, sigur Dan Nielsen.
Hann sigur, at samanumtikið var Noregsferðin væleydnað og styrkti teir í, at teir høvdu góð kort á hondini, tá ið teir bjóðaðu Drelnes fram til oljuhavn.
