Fáa vit ikki nakran skelk, er hugsandi, at arbeiðsloysið fer at verða uppaftur lægri í ár
Tað er metingin hjá stjóranum og stýrinum fyri ALS og har eru tey sostatt rættiliga vónrík um gongdina.
Nú tey hava almannakunngjørt roknskapin fyri í fjør, staðfesta tey, at í miðal var arbeiðsloysið 3,8 prosent í fjør og tað svarar til, at stívliga 1.000 fólk vóru fulltíðararbeiðsleys.
Hóast Búskaparráðið væntar lægri búskaparvøkstur næstu árini, vænta tey í ALS vøkstur, og tekin eru um, at góða gongdin við nógvum virksemi, og lágum arbeiðsloysi, fer at halda fram í ár eisini.
Fleiri stór byggjarí er í gongd, og ítøkiligar ætlanir eru um at fara undir aðrar stórar verkætlanir næstu tíðina. Nýggjur Versturskúli skal byggjast, og Landssjúkrahúsið skal byggjast út. Á Glyvrum eru tey hjá Bakkafrost farin undir at byggja nýggjan, stóran virkisbygning, og fyrstu fyrireikingarnar eru farnar í gongd til báðar teir nýggju undirsjóvartunlarnar. Tosað hevur eisini verið um at byggja havnalagið í Havnini út fyri stórar upphæddir.
- Tað er nú so stórur tørvur á fólki innan byggivinnuna, at tað eru ov fáir føroyingar við neyðugum førleikum tøkir, og tí er neyðugt at fáa útlendingar til Føroyar at arbeiða.
- Samstundis sum virksemið í byggivinnuni er í hæddini í Føroyum, eru tekin um, at tað er minni at gera í oljuvinnuni í Noreg.
- Oljuprísurin er nógv minkaður í 2014, og tað hevur havt við sær, at íløgurnar í hesi vinnuni eru minkaðar.
- Javnan frættist um hópuppsagnir í oljuvinnuni, og eisini eftirspurningurin eftir føroyskari arbeiðsmegi í Noreg tykist at vera minkaður. Tí eru fleiri av hesum fólkum komin aftur til Føroyar og eru nú tøk á føroyska arbeiðsmarknaðinum.
Als staðfestir, at tað gongur framvegis væl í alivinnuni, men fæst ikki bilbukt við laksalúsuni, kann hon av álvara verða ein hóttan.
Tað gongur eisini væl í ávísum parti av fiskivinnuni, helst uppsjóvarvinnuni, men eisini hjá langfaratrolarunum gongur væl.
Hinvegin hevur landsstýrið sett sær fyri, at hallið skal vera burtur í 2016. Hvussu hall verður vent til javnvág, ella avlop, er ikki greitt, men umframt størri inntøkur frá fiski- og alivinnuni, er væntandi við sparingum hjá tí almenna og tað kann fara at hava við sær minni virksemi, og at arbeiðsloysið aftur fer at kvinka uppeftir.
- Samanumtikið sær út til, at nógv virksemi verður í ár og at arbeiðsloysið fer at minka enn meiri, sigur ALS.
