Men tað slepst valla undan Heðini Mortensen sum borgarstjóra, nú hann og Javnaðarflokkurin standa til ein søguligan valsigur.
Sambært kanningini, sum Gallup gjørdi fyri Sosialin í síðstu viku, so er sætta umboðið hjá Javnaðarflokkinum og trappuni, og sambært kanningini, sum Gallup hevur gjørt fyri Norðlýsið hesa vikuna, so fer Javnaðarflokkurin at tryggja sær sætta umboðið í Tórshavnar býráð.
Tað merkir, at Javnaðarflokkinum nýtist bert eitt umboð afturat fyri at tryggja sær meiriluta – og teir møguleikarnir eru fleiri, tá Tjóðveldi ikki hevur bundið seg til samstarv við Javnaðarflokkin:
Sambært fyrru kanningini, so kann Framsókn fáa eitt umboð valt. Tað tykist bæði vist og sannlíkt, at Sambandsflokkurin fær í hvussu so er eitt umboð valt. Um so verður, so verða fimm sessir at býta millum Fólkaflokk og Tjóðveldi.
Endurskipa Javnaðarflokkurin og Tjóðveldi samgonguna, so verður tað ein breið samgonga. Men skipar Javnaðarflokkurin samgongu saman við Sambandsflokkinum, so fær Javnaðarflokkurin nógv størri ávirkan einsamallur.
Annfinn Brekkstein verður varaborgarstjóri og fær ein annan týðandi formanssess – og so hevur Sambandsflokkurin størstu ávirkan.
Politikkur snýr seg um ávirkan. Og ávirkan er vald við einum penari orði.
Men politikkur snýr seg so sanniliga eisini um taktikk. Men viðhvørt so skuggar tráanin eftir ávirkan (altso valdi) fyri skilvísinum í at gera avtalur.
Um Tjóðveldi og Javnaðarflokkurin ynsktu at tryggja sær valdið saman framman undan valinum, so tóku tey hvønn annan í hondina og søgdu: »Vit halda fram við samstarvinum. Tann av okkum, sum størri verður, fær borgarstjóran«.
Tá Sosialurin týsdagin spurdi Heðin Mortensen og Jógvan Arge um hetta, segði Heðin Mortensen greitt ja, meðan Jógvan Arge gav eitt kryptiskt snikk-snakk svar.
Gott nokk er tað so nemt og bíligt hjá Heðini Mortensen at siga ja, tá hann er ein tryggur vinnari.
Men tað kann verða dýrt hjá Tjóðveldinum at spæla við musklunum, tí tað er so skjótt at verða settur uttan fyri valdið – altso ávirkan.
Politikkur er stríð um vald. Vápnini eru mangan náðileys – men nokso óskiljandi, at flokkar, sum siga seg samstarva væl, ikki kunnu spæla opið spæl fyri veljarunum...
