Alice skal leiða tey ungu í Vági

Nú fer Vágs Býráð undir at hava fleiri miðvís tilboð til tey ungu í kommununi.

Í hesum sambandi er Alice Simonsen, høgrumegin á myndini, sett í starv at leggja til rættis og at samskipa tilboðinu til tey ungu.

Á myndini er hon saman við Sirið Stenberg, forkvinnu í mentanarnevndini hjá Vágs Býráð.

Í fleiri áratíggju hevur ynski verið um at fáa eitt ungdómshús í Vági og fyri jól samtykti Vágs Býráð at seta eitt ungdómstilboð stovn.

Í fyrstu atløgu verður talan um eina roynd í tríggjar mánaðir nú í vár.
 
Síðani hetta er søkt eftir fólki og samstundis sum farið er undir at finna skikkaði høli.

Og í gjár byrjaði so Alice Simonsen sum leiðari av ungdómstilboðnum í Vágs kommunu. Alice er námsfrøðingur, men hevur á sínari starvsleið verið víða, millum annað í ungdómshúsum bæði í Føroyum og uttanlands.

Sostatt hevur hon drúgvar royndir við arbeiði við børnum og ungum.

Ungdómstilboðið kemur at halda til í húsinum, sum fólk í Vági vanliga kenna sum Billardhúsið.
 
Alice er longu farin verka, og í gjár var hon í Vágs skúla og tosaði við tey ungu, sum eru í aldursbólkunum, sum ungdómstilboðið er ætlað til.