Í sambandi við 60 ára dagin hevur Amnesty International almannakunngjørt eina nýggja frágreiðing, og har fáa heimsins stjórnarleiðarar av grovfílini. Sagt verður, at leiðararnir mugu taka leiðsluna í mannarættindaarbeiðinum, at fólk framvegis verða pínd ella illa viðfarin í minst 81 londum, at fólk verða órættvíst dømd í minst 54 londum, og at í minst 77 londum hava fólk talufrælsi.
Amnesty International sigur, at 2007 var merkt av fólksliga bardaganum fyri mannarættindum, ið til dømis fór fram millum munkar í Myanmar (Burma) og advokatar í Pakistan. Men árið í fjør var eisini merkt av, at stjórnir í vesturheiminum vístu seg at vera máttleysar og trekar at taka sær av nøkrum av heimsins mest álvarsomu mannarættindakreppum. Ófriðurin og yvirgangurin í Darfur, Zimbabwe, Gaza, Irak og Myanmar krevja, at farið verður til verka á altjóða støði alt fyri eitt, sigur felagsskapurin.
Mugu ganga undan
Amnesty International ávarar um, at størsta hóttanin móti mannarættindunum er fráveran av einari felags alheimsvisión og einari alheimsleiðslu.
- Órættvísi, ójavni og revsifrælsi eyðkenna heimin í dag. Men 2008 umboðar ein søguligan møguleika fyri at fara nýggjar leiðir og vraka trongskygda politikkin, sum seinastu árini hevur gjørt heimin til eitt meira vandamikið og syndrað stað. Ráðandi londini mugu vísa seg sum fyrimyndir og ganga á odda, segði Irene Khan, aðalskrivari, tá frágreiðingin varð løgd fram.
- Heimsins stjórnarleiðarar avsanna veruleikan. Hesin atburður kostar dýrt. Sum Irak og Afghanistan hava víst okkum, eru mannarættindatrupulleikar ikki einstaddir sorgarleikir. Teir eru sum virus, sum kunnu spjaðast skjótt, so vit øll koma í vanda, segði Irene Khan.
(Kelda: AI, Føroya deild)
