Sambært veljarakanningini, sum Gallup-Føroyar gjørdi fyri Sosialin í síðstu viku, so er tað ein meiriluti av Føroya fólki, sum ikki ynskir flatskattaskipanina hjá landsstýrinum.
Gallup Føroyar hevur biðið fólk geva skipanini ein karakter frá 1 til 10, har 1 er tann ringasti og 10 tann besti karakterurin.
Kanningin vísir, at 64 prosent geva ætlanini ein karakter undir miðal. Heili 40 prosent geva ætlanini botnkarakter.
Hinvegin vísir kanningin, at 22 prosent geva ætlanini ein karakter yvir miðal, har av átta prosent geva ætlanini toppkarakter.
Um vit býta tey sum svara í tveir bólkar, har ein er positivur og hin er negativur – tey, sum geva ætlanini yvir miðal og undir miðal – so eru tveir triðingar negativir, meðan bert ein triðingur er positivur.
Bestu undirtøku í Fólakflokkinum
Hyggja vit so eftir teimum fýra samgonguflokkunum, so hevur uppskotið um flatskatt størstu undirtøkuna í Fólkaflokkinum. Veljarar floksins geva í miðal ætlanini karakterin 6,4 á hesum sama skala millum 1 og 10. Flestu veljararnir hjá Fólkaflokkinum geva ætlanini toppkarakterin 10. Tey eru 23 prosent, meðan 15 prosent geva ætlanini botnkarakterin 1.
Hetta er helst ikki so galið útgangspunkt hjá Jørgen Niclasen og Fólkaflokkinum, tí tað vísir, at veljararnir hjá flokkinum taka undir við ætlanini.
Hinvegin er undirtøkan ikki eins góð í hinum samgonguflokkunum.
Miðflokkurin næstheitastur
Næststørstu undirtøkuna hevur flatskattaskipanin millum veljarar hjá Miðflokkinum. Veljarar floksins geva ætlanini miðalkarakterin 4,0.
26 prosent av veljarunum hjá Miðflokkinum geva tó ætlanini botnkarakterin 1, meðan 18 prosent geva ætlanini toppkarakterin 10. Men í miðal fær ætlanini karakterin 4,0 frá veljarunm Miðfloksins.
Veljararnir hjá Sambandsflokkinum geva ætlanini miðalkarakterin 3,8. Heili 38 prosent av veljarunum hjá Sambandsflokkinum geva ætlanini botnkarakterin 1, meðan 19 prosent geva ætlanini toppkarakterin 10.
Veljarar hjá Sjálvstýrisflokkinum taka als ikki undir við ætlanini. Teir geva ætlanini karakterin 2,4 – sum enntá er lægri karakterur, enn veljararnir hjá Javnaðarflokkinum geva ætlanini.
59 prosent av veljarunum hjá Sjálvstýrisflokkinum geva ætlanini botnkarakterin 1, men bert seks prosent geva ætlanini toppkarakterin 10.
Størsta mótstøða í Tjóðveldi
Av teimum trimum andstøðuflokkunum, Tjóðveldinum, Javnaðarflokkinum og Framsókn, er tað Tjóðveldi sum heldur minst um ætlanini við flatskattinum. Tjóðveldisveljarar geva ætlanini miðalkarakterin 2,1. Heili 66 prosent geva ætlanini botnkarakterin 1, meðan 10 prosent geva ætlanini toppkarakterin 10.
Næstringasta karakterin í andstøðuni fær flatskattaskipanini frá Javnaðarflokkinum – hóast flokkurin er eitt sindur heitari fyri skipanini enn Sjálvstýrisflokkurin.
Veljararnir hjá Javnaðarflokkinum geva flatskattaskipanini miðalkarakterin 2,9.
57 prosent av javnaðarveljarunum geva ætlanini botnkarakterin 1, meðan 11 prosent geva skipanini toppkarakterin 10.
Veljararnir hjá Framsókn eru eitt sindur heitari fyri flatskattaskipanini, enn hinir andstøðuflokkarnir. Teir eru líka heitir fyri skipanini, sum veljararnir hjá Miðflokkinum, og eitt veit heitari fyri skipanini, enn veljararnir hjá Sambandsflokkinum. Veljararnir hjá Framsókn geva ætlanini miðalkarakterin 4,0.
39 prosent av veljarunum hjá Framsókn geva ætlanini botnkarakterin 1, meðan sjey prosent geva ætlanini toppkarakterin 11.
Skulu vit bólka flokkarnar eftir, hvør tekur mest undir við flatskattaskipanini hjá landsstýrinum, so verður úrslitið hetta:
1. Fólkaflokkurin 6,4
2. Miðflokkurin 4,0
3. Framsókn 4,0
4. Sambandsflokkur. 3,8
5. Javnaðarflokkurin 2,9
6. Sjálvstýrisflokkur. 2,3
7. Tjóðveldi 2,1
