Seinnu fjórðingsfinalurnar í Champions League vera spældar hesa vikuna. Longu í kvøld vóru fyrstu dystirnir spældir, tá Manchester City og Paris Saint Germain møttust í aðrari, meðan Real Madrid og Wolfsburg møttust í hinari.
Í dystinum á Etihad leikvøllinum í Manchester var alt opið undan dystinum. Fyrri dysturin, sum varð spældur í París fyri viku síðani endaði við 2-2 javnleiki, og tí var ikki til at siga, hvør ið mundi fara at draga longra stráðið og vinna sær pláss í hálvfinaluni.
City vann uppiborið
Tað varð heimaliðið, ið varð omaná í kvøld og vann dystin 1-0. Einsamalla málið í dystinum skeyt belgiski Kevin De Bruyne tá eitt gott korter restaði av dystinum.
Sum heild var sigurin hjá Manchester City fult uppiborin, tí teir vóru í kvøld greitt omaná ímóti Paris Saint Germain. Í fyrra hálvleiki hevði Sergio Aguero gyltan møguleika at leggja City á odda, men hann misnýtti brotssparkið, sum hann annars sjálvur fekk.
Ronaldo-show í Madrid
Hin dysturin var á Bernabeu leikvøllinum í Madrid, har Real Madrid undan dystinum hevði knívin á barkanum, eftir at Wolfsburg hevði vunnið fyrru uppgerðina 2-0 í Týsklandi.
Men Real Madrid og serliga Cristiano Ronaldo lótu frá byrjan av í dystinum í kvøld ongan iva vera um, at Real Madrid ætlaði sær pláss ímillum tey fýra bestu í Champions League. Cristiano Ronaldo legði í fyrra hálvleiki Real Madrid á odda 1-0 og 2-0, soleiðis at alt tá stóð á jøvnum innanhýsis.
Sami Cristiano Ronaldo slerdi í seinna hálvleiki sigurin fastan fyri Real Madrid, tá hann eisini skoraði til 3-0 sum eisini varð endaliga úrslitið. Hann fekk sostatt hattrick.
Gott Champions League ár hjá Ronaldo
Merkisvert er at nevna at í teimum 10 dystunum sum Cristiano Ronaldo hevur spælt í Champions League hetta kappingarárið, hevur hann skotið 16 mál og lagt upp til 4, sum eru suverent góð hagtøl.
Í annaðkvøld vera seinastu fjórðingsfinalurnar leiktar. Tær eru millum Atletico Madrid-Barcelona og Benfica-Bayern Munchen.
Dystirnir í kvøld:
Manchester City – Paris Saint Germain 1-0 (0-0)
1-0 Kevin De Bruyne, 76.
Real Madrid – Wolfsburg 3-0 (2-0)
1-0 Cristiano Ronaldo, 16.
2-0 Cristiano Ronaldo, 17.
3-0 Cristiano Ronaldo, 77.
