Ukrainski herurin hevur elvt russisku herdeildunum munandi tap í bardøgum í Donbas-regiónini har eysturi í Ukraina.
Tað sigur ukrainski forsetin, Volodymyr Zelenskyj, í einari av sínum video-talum í dag, og tað er tíðindastovan Reuters sum endurgevur.
Norska kringvarpið NRK endurgevur eisini hesa útsøgn hjá ukrainska forsetanum í kvøld.
Volodymyr Zelenskyj sigur, at tað er serliga nærindis býnum, Vuhledar, at russisku tapini hava verið stór.
- Vit leypa á teir, sum royna at troka seg inn á okkum og elva teimum munandi tap, segði forsetin millum annað í einari av røðum sínum.
Ukrainski forsetin sigur, at jú størri tapini hjá Russlandi eru í Donbas-økjunum, Bakhmut, Vuhledar, Marinka, Kreminna, jú skjótari endar kríggið.
- Til sigurs fyri Ukraina, leggur Volodymyr Zelenskyj aftrat.
