Landskassin hevur fingið nógv minni inn í skatti fyrstu 10 mánaðirnar í ár, enn hann fekk 10 teir fyrstu mánaðirnar í fjør.
Tað vísir ein nýggj uppgerð hjá Taks.
Uppgerðin vísir, at higartil í ár hevur landskassin fingið 1.011.225.688 krónur inn í vanligum lønarskatti. Tað eru heilar 223.492.163 milliónir minni enn í fjør, tá ið landskassin fekk 1.234.717.851 krónur inn í skatti frá januar til oktober.
Tað er ein afturgongd upp á 18,10%.
Men tað, sum bjargar støðuni eitt sindur, er, at higartil í ár hevur landskassin eisini fingið 173.243.018 krónur inn í skatti av inngjaldi til pensjónir.
Men sostatt verður úrslitið, at tilsamans hevur landskassin fingið 50.249.145 krónur minni inn í skatti higartil í ár, aftur ímóti í fjør.
Hinvegin hava føroysku kommunurnar tilsamans fingið 30 milliónir krónur meira inn í skatti sammett við sama tíðarskeið í fjør.
Í prosentum er talan um ein samanlagdan vøkstur á 2,62 %.
Ímillum størru kommunurnar, ið hava fingið fleiri pengar í kommunukassan, eru Tórshavnar Kommuna, Klaksvíkar kommuna, Fuglafjarðar kommuna, Runavíkar kommuna, Sunda kommuna og Vága kommuna.
