Á fundi við uttanlandsnevndini í morgun hevur Maria Damanaki staðfest týdningin av at finna semju ímillum føroyingar og ES
Uttanlandsnevndin hevur hitt Damanaki í morgun og har hevur hon endurtikið, at hon heldur, at tað hevur stóran týdning, at Føroyar og ES, sum góðir grannar, finna eina semju.
- Eg haldi, at vit høvdu ein góðan fund, sigur Jákup Mikkelsen, formaður í uttanlandsnevndini.
Báðir partar hava ført síni sjónarmið fram og eg haldi, at huglagið ímillum partarnar er betri nú, enn tað hevur verið, sigur Jákup Mikkelsen.
Damanaki hevur víst á týdningin av góðum grannaldi og at hon vónar vit finna eina semju. Hon skilir okkara sjónarmið, men hennara avbjóðing er, at hon skal finna semju í 28 ES londum.
Jákup Mikkelsen sigur, at Uttanlandsnevndin hevur enn einaferð gjørt vart við føroysku misnøgdina við, at ES brúka boykott sum eitt amboð at trumfa sín vilja ígjøgnum.
Vit hava víst á, hvussu stóran týdning, fiskivinnan hevur fyri okkum og at vit hava rætt til munandi størri kvotu, enn vit hava fingið.
|
