Vit høvdu eitt fínt prát, og semja er um at arbeiða víðari við málinum. Tað sigur Dennis Holm, formaður í Kommunufelagnum.
Í gjár var Kommunufelagið á fundi við Jørgen Niclasen, landsstýrismann í fíggjarmálum um at stovna ein føroyskan náttúruvanlukkugrunn sum kann hjálpa til við endurbyggingini, tá ið náttúruvanlukkur herja.
Nógv varð tosað um ein slíkan grunn eftir kyndilsmessuódnina í 2008, men tað fjarðaði burtur aftur.
Men nú er kjakið kyknað upp aftur eftir øgiliga brimið um vikuskiftið, táið stórir skaðar hendu í Hvalba, í Porkeri, í Skopun, í Nólsoy, rundan um Kaldbaksfjørð, og aðrastaðni við.
Jørgen Niclasen, landsstýrismaður í fíggjarmálum, gjørdi greitt í KvF, at kommunur skulu ikki dúva upp á fíggjarligan stuðul úr landskassanum til endurbyggingina eftir hesa náttúruvanlukkuna.
Hinvegin er vilji til at virka fyri, at vit fáa ein náttúruvanlukkugrunn, sum kann hjálpa til, tá ið slíkar vanlukkur henda í framtíðini.
Í tí samandi hittust umboð fyri Kommunufelagið, og Jørgen Niclasen, á fundi í gjár at viðgera málið.
– Vit høvdu ein góðan fund, har vit samdust um at arbeiða víðari við málinum, sigur Dennis Holm.
Hann sigur, at tað eru nógv viðurskifti, sum greiðast skal á og tískil avtalaðu partarnir, at eitt umboð fyri Kommunufelagið og eitt umboð fyri Fíggjarmálaráðið, skulu seta seg saman við serkønum á hesum økinum, við tí endamáli at fella niður á pappír, hvussu ein slíkur grunnur skal skipast, og so fáa kommunurnar høvi til at taka støðu til tað.
Í hesum sambandi er ein av spurningunum, hvussu inngjaldið skal skipast, og ein annar spurningur eru, nær gjaldast skal úr grunninum, og um kommunurnar skulu hava eina ávísa sjálvsábyrgd.
Í sambandi við inngjald, kann ein møguleiki vera at kommunur rinda í grunnin eftir fólkatalinum, men ein annar máti kann vera, at kommunur rinda ein ávísan prosentpart av kommunuskattinum í grunnin.
Spurningurin er eisini um ein slíkur grunnur eisini skal rinda fyri tær vanlukkur, sum hendu í briminum hetta vikuskiftið, ella um hann bara skal rinda fyri tær vanlukkur, sum fara at henda í framtíðini.
Í hesum sambandi verður tað ein avbjóðing, at grunnurin verður ikki serliga peningasterkur ta fyrstu tíðina, men spurningurin er so um hann skal fáa heimild at taka lán.
– Ein annar spurningur er eisini um landskassin skal spjaða til ein slíkan grunn fyri at fáa gongd í hann beinanvegin, sigur Dennis Holm.
