Fólk á Fiskimálaráðnum siga seg vera áhugað at vera við í arbeiðinum at seta ein stovn sum Seafish á stovn, um vinnan sjálv ynskir at fáa ein stovn eftir tí leistinum. Spurd um hví eingin samfelagslig gransking innan fiskivinnuna hevur vunnið frama áður í Føroyum, svarar Marita Rasmussen fyri Fiskimálaráðið, at tað helst er siðvenjan í Føroyum.
Hon vísir á, at í øðrum londum er siðvenja at granska nógv í fiskivinnuni, men hetta hevur ikki verið galdandi í Føroyum í eins stóran mun.
-Arbeiðið hjá Seafish vil eg ikki kalla gransking, men meira kunning, tí stovnurin kemur ikki við nakrari nýggjari vitan, men heldur er talan um ymiskar staðfestingar í ensku fiskivinuni, sigur Marita Rasmussen.
Hon vísir á, at í løtuni verða góðar 12 milliónir játtaðar til Fiskivinnuroyndir, ið granskar í fiskivinnuni, men Fiskiroyndir granskar í øðrum økjum enn Seafish ger. ? Frá landsins síðu verður meira satsa uppá gransking enn kunning, sigur Marita Rasmussen.
Marita leggur dent á, at í høvuðsheitum er enski stovnurin fíggjaður privat, og tískil eigur vinnan sjálv í Føroyum koma við uppskotið um ein slíkan stovn, um tey ynskja tað. ? Fiskimálaráði er sjálvsagt áhugað í at hyggja nærri at einum líknandi stovni saman við vinnuni, um vinnan veruliga ynskir tað, sigur Marita Rasmussen at enda.
