Vilhelm Poulsen og liðfelagarnir í Lemvig-Thyborøn spældu í kvøld dyst á útivølli ímóti Mors í bestu donsku hondbóltsdeildini.
Dysturin millum Mors og Lemvig-Thyborøn endaði við javnleiki 27-27. Í allarseinasta sekundinum eydnaðist tað Kasper Lindgren at javna fyri Mors til endaliga úrslitið 27-27, og tað kunnu Vilhelm og liðfelagarnir veruliga iðra seg um.
Lemvig-Thyborøn var greitt omaná í fyrra hálvleiki, og í steðginum var Lemvig-Thyborøn á odda 16-11. Tað gekk ikki líka væl í hond í seinna hálvleiki, og í seinasta sekundinum mistu Vilhelm og liðfelagarnir ein kærkomnan sigur.
Talan er um fimta javnleikin hjá Lemvig-Thyborøn í 20 dystum.
Vilhelm skoraði trý mál og legði upp til trý mál í kvøld.
Lemvig-Thyborøn er aftast í deildini við 11 stigum. Kolding er næstaftast, eisini við 11 stigum, og Nordsjælland er triðaftast við 12 stigum.
Komandi leygardag tekur Lemvig-Thyborøn móti Ribe-Esbjerg á heimavølli.
