Tað er seint á kvøldi. Landsliðið skal avstað tíðliga morgunin eftir og 20 ára gamli miðvallarin er spentur. Hann hevur leikbann til fyrra dystin móti Írlandi og tað ávirkar lagið nakað.
- Eg skal ikki missa plássið á landsliðnum. Eg ætli mær at spæla á landsliðnum til eg ikki kann spæla fótbólt meir, sigur hann avgjørdur á málinum.
Hann er ungur og hevur nakað hann ætlar at prógva. Hann er óspoleraður í sínum viðmerkingum. Hann meinar einki ringt um hinar, men hevur bara sett sær sjálvum nøkur høg mál og hann sigur tað sum hann meinar tað. Eftir eina løtu kemur tað so.
- Also, eg meini einki ringt um hinar. Eg gleði meg faktist at síggja Heina Vatnsdal spæla, men eg havi sett mær sjálvum eitt mál um at spæla fast á landsliðnum, leggur hann afturat.
Her er einki uttanum tos. Einki við at tosa um ein dyst á gangin og bara at gera sítt besta. Ungi havnarmaðurin hevur sett sær nøkur greið mál og nú mál røkka ella støkka sum yrkisspælari.
Bugarin, ið mundi forkomið Aberdeen møguleikanum
Hallur er sonur Hans Nielsen og Hannu Mikkelsen. Hann búði fyrstu árini á Argjum, men flytir sum átta ára gamal til vágs, tí boð eru eftir Hansi at venja VB. Hallur minnist árini í Vági við gleði.
- Tað var tá tað bleiv stuttligt at spæla fótbólt, men eg var for sjálvsøkin. Eg bara dribblaði. og hinir skeldaðu meg altíð, sigur Hallur og flennir.
Sum 11 ára gamal gongur leiðin aftur til havnar. Boð eru eftir Halli á U15 landsliðnum nøkur ár seinni og í Aberdeen ger føroyska liðið um seg og vinnur Aberdeen International Football Festival. Hallur skjýtur framúr mál í finlauni.
Nakað seinni eru boð eftir honum á U17 landsliðnum og góðu avrikini gera, at Hallur og Gilli Sørensen verða bodnir til venjing í Aberdeen. Móti endanum av royndarvenjingini skal dystur spælast. Hallur er greiður yvir, at tað er nú hann skal vísa seg fram, men tað blivur bara til eina løtu á vøllinum.
- Undan dystinum vóru allir og ótu á eini Pub tætt við vøllin. Eg át ein burgara og fekk so ilt í búkin, at eg mátti fara av vøllinum aftaná eitt korter ella so. Eg helt at tað var mín møguleiki, ið reyk, greiðir Hallur frá og undirstrikar, at tað var við vælsignilsi frá venjaranum, at burgarin bleiv etin.
Hóast Hallur mátti av vøllinum, so fáa bæði Hallur og Gilli sáttmála í skotska felagnum, men tað var ikki bara eydnan at flyta til Aberdeen.
- Tað var ræðuligt, minnist Hallur afturá.
Hallur og Gilli flyta inn til eina familju har mamma og sonur búðleikast. Mamman er ein 70 ára gomlu kona, ið ikki hevur orku at ansa eftir tveimum ungum dreingjum, meðan 40 ára gamli sonurin hvørki hevur áhuga í ítrótti ella at smílast.
- Hann grenjaði um alt. Serliga um vit ikki ótu upp, so var galið, greiðir Hallur frá.
Tað einu ferðina spyr sonurin Gilla og Hall um teir kundu hugsa sær pylsir til døgurað. Teir svara báðir játtandi, men á døguraðborðið koma grønar ólekkarar pylsir, sum hvørki Hallur ella Gilli klára at býta í.
- Vit tordu ikki at siga tað við hann, so vit pakkaðu tær í serviettar og koyrdu tær í lumma, men Gilli valdi at koyra sínar í ruskílatið í kamarinum, sum sonurin í húsinum sjálvur tømdi, sigur Hallur flennandi og leggur afturat, at Gilli fekk av at vita, tá tað gjørdist greitt, at hann ikki hevði etið upp.
- Eg tók mínar við til venjing og tveitti tær í eitt ruskílat, sigur Hallur.
Sum liður í at Hallur fleiri ferðir er við á besta liðnum skal hann syngja frammanfyri hinum. Teir eru tríggir, ið skulu syngja. Liðið er samlað á fínari matstovu. Tað gongur illa hjá teimum báðum undangongumonnunum, sum ikki fáa undirtøku millum vaksnu spælararnar. Hallur er í villareiðu og hevur lært frá føroyska Rógva S. Holm, sum er í felagnum samstundis, at føroyski stjósangurin heldur ikki fær undirtøku millum spælararnar.
- Eg kundi bara koma í tankar um ein sang. Eg búði saman við Gilla og TB-sangurin gekk í heilum. So oftani, at eg dugdi hann uttanat. Eg valdi bara at koyra á og sang við fullari megi og áðrenn eg visti av, so stóðu spælararnir uppi og klappaðu við, sigur Hallur Hansson flennandi.
Í novembur 2010 fær Hallur debut á besta liðnum. Tað gongur illa í felagnum og í hálvleikinum er 2-0 til mótstøðuliðið. Mark McGhee er venjari, men verður koyrdur stutt seinni. Í hansara stað kemur fyrrverandi skotski landsliðsvenjarin, Craig Brown. Hann hevur ikki eitt gott eyka á Halli, sum ikki sleppur so mikið sum at venja við besta liðnum. Heldur ikki tá Hallur í innanhýsis venjingardysti skaraði framúr.
- Eg skuldi bara vísa fyri honum hvat hann misti, men eg fekk at vita aftaná, at hann dámdi meg ikki sum spælara, sigur Hallur.
Skaddur í unglingadysti
Í 2011 er Hallur úttikin til A-landsliðið og U21 landsliðið, sum bæði hava altjóða uppgávur í Føroyar. Hallur venur við HB og nakað fyri altjóða uppgávurnar tekur Hallur eina avgerð, sum hann í dag angrar. HB unglingar skuldu spæla dyst í vágunum og heima við hús er tvídráttur um Hallur skal fara við.
- Babba bleiv við at siga, at eg ikki skuldi fara, tí eg kundi blíva skaddur, men eg fór alíkavæl, greiðir Hallur frá.
Hallur verður settur í álopið. Móti endanum er støðan 5-0 til HB, men í verjuni hevur ein spælari fingið ilt eyga á Hall.
- Eg hevði sett hann av fleiri ferðir og hann bleiv argur. Móti endanum seti eg hann av aftur og so tveitur hann seg niður aftanifrá og taklar niður á beini hjá mær, sigur Hallur.
- Eg veisti beinanvegin, at tað var gali. Tað fyrsta eg hugsaði var hvussu eg skuldi fortelja babba tað, sigur Hallur.
Á skaðastovuni er lítil hjálp at heinta. Læknin hevur lítlan hug at hjálpa Halli, sum fær bind um fótin og boð um, at hann verður klárur um tríggjar dagar. Hann situr uttanfyri í 11 vikur og spælir ikki móti Estlandi – ein dystur sum Føroyar vinnur 2-0.
Aftur til útlandið
Hallur ger nú avtalu við HB og spælir seinastu dystirnar í 2011 í Gundadali. Árið eftir er hann aftur at finna á miðvøllinum hjá HB og verður valdur til ársins miðvallara.
Í summarsteðginum hevur Hallur vant við danska felagnum AaB úr Aalborg. Eftir eitt sindur av stríðið verður leiguavtala gjørd fyri restina av árinum og Hallur flytir til Danmarkar.
Og tað gongur skjótt. Bara fáar dagar eftir at hann lendur spælir hann í steypakappingini móti Skovbakken. Síðani kemur hann inn í nakrar minuttir móti Brøndby, áðrenn hann fær ein skelk og byrjar inni móti FCK í Parkini. AaB tapir 5-0 og Hallur spælir ikki væl.
- Eg hevði vilja sloppið at spælt tann dystin umaftur. Eg var ikki heilt klárur og tað var eitt sindur “unfair”, um eg kann siga so, at fáa akkurát handan dystin. Eg var als ikki við dystin frammanundan, so eg fekk ein skelk, tá eg fekk at vita at eg skuldi byrja inni, sigur Hallur.
Hallur hevur ment seg síðani tann dystin og hevur millum annað staðið seg væl á miðjuni fyri eykaliðið móti FCK, sum hevði menn sum Daniel Jensen og Martin Vingaard á miðvøllinum.
Hallur hevur brúkt nógv tíð upp á at innrætta seg eftir spælistílinum í felagnum. Hallur hevur fingið ein heilt ávísan leiklut á miðvøllinum.
- Tað er ikki sum í Føroyum, har tú til eitt vist sjálvur kanst avgera hvat tú gert á vøllinum. Her fært tú eina læsta uppgávu og hana skalt tú halda teg til, sigur Hallur.
Uppgávan hjá Halli er at verða “6’arin” á liðnum. Hann er á miðvøllinum og skal at kalla hvørja ferð venda og finna ein av teimum fremstu monnum við avlevering.
Hallur hevur eitt ár eftir á sáttmálanum og er greiðir yvir, at tað er nú hann skal sláa til.
Orkar ikki fyri negaviteti
Hallur er lívligur tá tann tosar og greiðir frá. Tað er ikki til at taka feil av hvat hann hugsar og meinar við.
Tað er eisini tilfeldið, tá tosið fellur inn á nógvar av teimum negativu viðmerkinginum, sum føroyskir fótbóltsspælarar fáa. Bæði tá talan er um spælarar, ið royna seg uttanlands og tá landsliðið tapir.
- Eg orki ikki fyri negativiteti. Tað er strævið altíð at lesa hvussu vánaligir vit eru og at føroyskir spælarar ikki sláa til uttanfyri Føroyar, sigur Hallur og vísir á millum annað viðmerkingarnar á føroyku tíðindaportalunum.
- Eg tosaði nógv við Jóan Símun Edmundsson eftir stórtapið fyri Eysturríki. Hann hevur eisini fingið nógvan kritikk. Ein maður sum Fróði Benjaminsen blívur ikki ávirkaður av tí, men tað blíva vit yngri í størri mun, sigur Hallur.
Hóast foreldrini biðja hann ikki taka tað so tung, so ávirka tær unga miðvallaran.
- Eg blívi óður og fái hug at mótprógva teimum. Eg skal mótprógva teimum, sigur Hallur at enda.
Umframt at spæla yrkisfótbólt, so er Hallur í holt við eina HF útbúgving. Nakað hann hevur lagt stóran dent á øll árini hann hevur spælt fótbólt.
