Leiðarin í tí illa gitna uppreistrarfelagsskapinum í Uganda, Harrans Mótstøðuheri, roynir nú at sleppa undan at verða settur fyri altjóða krígsbrotsmannadómstólin. Dómstólurin hevur kravt, at Joseph Kony og fýra av hansara næstu medarbeiðarum verða handtiknir, tí teir eru skuldsettir fyri grov brotsverk ímóti mannaættini í tí 20 ára langa borgarakrígnum har norðuri í Uganda. Fólk í tíggjutúsundatali eru deyð í krígnum, og umleið tvær milliónir fólk eru rikin frá húsi og heimi. Tað var ugandiska stjórnin, sum bað krígsbrotsmannadómstólin revsa Joseph Kony, men hann vil ikki fyri rættin og hevur nú biðið ST um samráðingar, so hann kann sleppa undan rættarsókn.
