Nú vit nærkast einum løgtingsvali er einki sum týðir uppá, at stríðið um nýggju fiskivinnulóggávuna fer at slaka. Tá munnligir fyrispurningar eru á skránni í løgtinginum í morgin skal landsstýrismaðurin í fiskivinnumálum, Høgni Hoydal, enn einaferð svara spurningum um uppboðssøluna.
Hesaferð er tað Jørgen Niclasen, formaður fyri Fólkaflokkin og fyrrverandi landsstýrismaður í m.a. fiskivinnumálum, ið vil hava landsstýrismannin at útgreina ymiskt, ið landsstýrismaðurin hevur sagt við miðlarnar viðvíkjandi uppboðssøluna.
- Landsstýrismaðurin í Fiskivinnumálum hevur í miðlunum boða frá, at hann ikki var nøgdur við seinastu uppboðssølurnar av fiskirættindum. Hann gjørdist kløkkur av, at tey sterku reiðaríini høvdu hægsta boð og keyptu fiskirættindini á uppboðssøluni, skrivar spyrjarin millum annað í spurninginum, ið hann hevur sent fjølmiðlunum.
Tí vil hann hava landsstýrismannin at svara, um hann hevur ætlanir um at útiloka ávís reiðarí frá at bjóða á uppboðssølu av fiskirættindum. Og um so er, hvussu landsstýrismaðurin ætlar at fremja tí broyting.
