Næsta ár eigur Arbeiðsloysisskipanin eina heila milliard á bók.
Tað hevur Heðin Mortensen, landsstýrismaður í arbeiðsmarknaðarmálum, upplýst fyri Løgtinginum.
Hann sigur at tað merkir, at sostatt kann ALS standa ímóti einum arbeiðsloysi upp á fýra prosent í eini fýra ár.
Hann heldur, at hetta merkir, at nú er Arbeiðsloysisskipanin so mikið væl bjálvað, at tað er ein spurningur, hvussu nógv tey framhaldandi kunnu loyva sær at krevja inn í gjaldi frá løntakarum og arbeiðsgevarum.
Men spurningurin er so um gjaldið skal lækkast munandi, ella um tað ber til at broyta endamálið við Arbeiðsloysisskipanini, soleiðis, at hon ikki longur bara skal brúkast til at lata arbeiðsloysisstuðul, men eisini kann brúkast til onnur endamál.
Í hesum sambandi heldur Heðin Mortensen ikki, at gjaldið skal lækkast. Tvørtur ímóti tekur hann undir undir við, at ein partur av tí, sum verður goldið í Als framyvir, verður brúkt til at seta ein arbeiðsmarknaðardepil á stovn.
Hann sigur, at sostatt kann ein arbeiðsmarknaðardepil setast á stovn, uttan at nakar merkir tað, sum so, og uttan at nøkur gjøld verða hækkað, og uttan at tað førir fleiri útreiðslur við sær.
– Tað vildi verið kærkomið at fingið eina semju um at fíggja ein arbeiðsmarknaðardepil upp á tann mátan, heldur landsstýrismaðurin í arbeiðsmarknaðarmálum.
Ein arbeiðsmarknaðardepil er eitt stað, har arbeiðsgevarafeløg, fakfeløg og politisku myndugleikarnir, samstarva um, hvussu arbeiðsmarknaðurin skal skipast
Ein arbeiðsmarknaðardepil kann samskipa verandi og komandi skipanir á arbeiðsmarknaðinum, ALS, barsilsskipan, Fasta Gerðarrættin, Samhaldsfasta, Frítíðargrunnin og Trygdargrunnin fyri lønir og avreiðingar.
Harumframt kann ein førleikamenningargrunnur verið umsitin í einum arbeiðsmarknaðardepli sum hesum.
