Kristina "Mulle" Kristiansen mátti bíða leingi til hon fekk spælitíð fyri Danmark í EM-endaspælinum í kvinnuhondbólti, sum er í Svøríki í hesum døgum.
Danska liðið hevði spælt heilar 402 minuttir av EM-hondbólti áðrenn Mulle fekk møguleikan. Tá Danmark stríddist ímóti Niðurlondum í hálvfinaluni í Scandinavium høllini í Gøteborg, og var væl aftanfyri gav venjarin, Klavs Bruun Jørgensen loksins Mulle møguleikan, og hon gjørdi vart við seg beinavegin.
TRÝST á PÍLIN á MYNDINI, og síggj Kristinu "Mulle" Kristiansen skora eitt sera vakurt mál við einum undirhondsskoti. Eitt mál hon skoraði stutt eftir hon slapp inn á vøllin.
Við danska blaðið BT sigur Mulle, at hon var glað fyri at fáa møguleikan. - Venjarin bað meg fara inn og gera tað, sum eg plagi at gera, men vit vóru aftanfyri við fimm málum seint í dystinum, og tá var tað torført at gera tann stóra munin, staðfesti Mulle.
Danmark og Frakland spæla um bronsuna i morgin klokkan 14.30. EM-finalan millum Noreg og Niðurlond verður klokkan 17 í morgin.
