TRÝST á PÍLIN á MYNDINI, og síggj hæddarpunktini frá sannførandi 23-17 (10-8) sigrinum hjá fronsku heimsmeistarunum yvir Svøríki í EM-millumbólki 1. Upptøkurnar eru frá evropeiska hondbóltssambandinum, EHF.
Um dystin skrivaði Jóannes Hansen á in.fo fyrr í kvøld: - Tað var leingi javnt og tætt, men tá ið tað restaði eitt korter tók at dragna, og so vann Frakland trivaligan 23-17 sigur ímóti Svøríki í fyrsta dystinum í miðumfarinum í EM í hondbólti, sum í hesum døgum er í Kroatia.
Sigurin ber við sær, at Frakland hevur seks stig. Fronsku heimsmeistararnir við eru harvið á veg ímóti hálvfinaluni.
Merkisvert er tað, at Frakland stóð seg so væl, sjálvt um Nikila Karabatic longu í 23. minutti sá reyða kortið. Hann verður ofta roknaður av vera heimsins besti hondbóltsspælari, og hann verður roknaður at vera týdningarmiklasti spælarin av øllum hjá Fraklandi.
Svøríki hevur fýra stig, og møguleikin at vinna seg í hálvfinaluna er ikki heilt burtur. Um tað skal eydnast, so er treytin, at teir gulu og bláu vinna tveir teir síðstu dystirnar í miðumfarinum – ímóti Hvítarusslandi og Noregi.
Fyri løtu síðani vann Kroatia 32-28 (17-15) á Noregi.
Støðan í EM-millumbólki 1:
| 1 | Frakland | 3 | 3 | 0 | 0 | 87:73 | 6 |
| 2 | Kroatia | 4 | 3 | 0 | 1 | 120:108 | 6 |
| 3 | Noreg | 4 | 2 | 0 | 2 | 124:119 | 4 |
| 4 | Svøríki | 3 | 2 | 0 | 1 | 82:79 | 4 |
| 5 | Hvítarussland | 3 | 0 | 0 | 3 | 76:90 | 0 |
| 6 | Serbia | 3 | 0 | 0 | 3 | 74:94 | 0 |
Mánadagin spælir Frakland ímóti Serbia klokkan 17.15, og Svøríki spælir ímóti Hvítarusslandi klokkan 19.30.
