Frakland og Ungarn hava við greiðum sigrum í kvøld í EM-millumbólki 1 gott og væl tryggjað sær pláss í EM-hálvfinalunum.
Frakland vann 31-23 (15-11) á Montenegro í Debrechen í Ungarn.
Grace Zaadi var toppskjútti hjá Fraklandi við sjey málum. Ivona Pavićević var toppskjútti hjá Montenegro við seks málum.
Vertstjóðin, Ungarn vann 31-21 á Póllandi. Tær ungarsku løgdu góðan botn í fyrra hálvleiki. Í steðginum var Ungarn á odda 17-9.
Petra Vamos var toppskjútti hjá Ungarn við átta málum. Aleksandra Rosiak var toppskjútti hjá Póllandi við fýra málum.
Frakland og Ungarn eru fremst í EM-millumbólki 1 við seks stigum hvør. Montenegro, Rumenia og Svøríki hava tvey stig hvør, og Pólland er aftast við ongum stigi.
Skráin sunnudagin er hendan: Montenegro-Pólland (klokkan 14.30), Ungarn-Rumenia (klokkan 17), Svøríki-Frakland (klokkan 19.30). Um Svøríki ikki vinnur á Fraklandi hava tær ongan møguleika at røkka hálvfinalunum.
HER ber til at síggja samandráttirnar hjá Eurohandball frá greiðu sigrunum hjá Fraklandi og Ungarn á Montenegro og Póllandi:
##med2##
##med3##
