Annað umfarið í samráðingunum um makrelbýtið næsta ár var í London mikudagin og hósdagin í seinastu viku. Fyrsti fundurin var ein meira óformligur fundur, sum nýggja makrel-strandarlandið Ísland hevði boðið til tíðliga í september.
Hóast føroysku luttakararnir allir lata væl at samráðingarandanum í London, so vórðu stóru spurningarnir – sum alt í veruleikanum snýr seg um – ásetingin av samlaðu strandarlandakvotuni fyri 2014 og býtið av henni útsett til eitt nýtt samráðingarumfar, sum ætlandi skal verða síðst í november.
ICES í gávuhýri
ICES hevur mælt til at hækka samlaðu kvotuna, TAC’ið, við 64 prosentum næsta ár í mun til tilmælið í ár, sum var 542.000 tons. Sostatt mælir ICES til at fiska 890.000 tons av makreli næsta ár.
Føroyskur samráðingarleiðari er Herluf Sigvaldsson, sum eisini stendur á odda fyri seksmannastóra samráðingartoyminum, ið Jacob Vestergaard, landsstýrismaður í fiskivinnumálum setti á stovn seint í summar. Umframt samráðingartoymið er føroyska sendinevndin sett saman av umboðum fyri føroysku sendistovuna í London, Føroya Reiðarafelag og Felagið Nótaskip.
Makrel-strandarlondini eru Føroyar, ES, Ísland og Noreg. Grønland og Rusland eru við sum eygleiðarar.
