Tað ræður um at fara í arbeiðsklæðini beinanvegin, tí mótstøðuliðið í fyrsta umfari verður roknað sum ein av favorittunum at vera við í kappingini um FM heitið. Soleiðis er tað hjá EB/Streymi, og soleiðis er tað hjá HB, sum er ársins fyrsti gestur við Margáir.
Tað eru fýra ár síðani, at meistararnir í HB síðst vunnu fulla úrtøku á útivølli ímóti EB/Streymi. Í fjør vann heimaliðið 2-0, í fyrraárið var 2-2 og 3-2 til EB/Streym, sum í 2011 vann 3-1. Í 2010 var HB eisini tvær ferðir í Sundalagnum, og tá vóru úrslitini 1-0 til HB og 1-1.
Mánakvøldið tapti HB stórsteypadystin ímóti Víkingi. Harvið er longu greitt, at meistararnir fara ikki at vinna øll steypini í ár. Í fjør var tað óvæntað, at HB í fyrsta umfari bara megnaði 1-1 ímóti grannunum í B36 í fyrsta umfari. Tá varð sagt, at favorittarnir høvdu gloymt at smoyggja seg í arbeiðsklæðini.
Undan ferðini norður eftir Streymoynni seinnapartin eru teir greiðir yvir, at tað verður neyðugt at spæla og stríðast. Úrslitini har norðuri seinastu árini siga tað, og mótstøðuliðið er ikki at spæla við.
-Málið er at enda millum trý tey fremstu. Vit eru stinnari á sentrala miðvøllinum enn í fjør, Vit ætla okkum at verða betri at stýra dystunum, men umstillingarnar og skjótu mótálopini eru avgjørt ein partur av okkara spælistíli, sigur Rúni Nolsøe, venjari í EB/Streymi. Sjálvandi er tað dyggur smeitur, um Arnbjørn Hansen ikki verður við.
Tá ið EB/Streymur í fjør vann 2-0 á heimavølli ímóti HB, var Arnbjørn Hansen eisini skaddur. Ta ferðina skoraðu Leif Niclasen og Levi Hanssen málini. Hesin seinni er nú HB spælari.
Rúni Nolsøe kennir væl dygdirnar hjá HB. Hann var í fleiri ár liðformaður á meistaraliðnum, og hann hevur eisini roynt seg sum venjari í HB
Heðin Askham er nýggjur venjari í HB, har hann spældi í nógv ár. EB/Streyma spælararnir og tey í Sundalagnum kenna væl Heðin Askham, og hann kennir felagið og spælararnar. 2009-2012 var hann venjari við Margáir, og tað riggaði væl. Hesi árini vann EB/Streymur FM í 2012 og silvur í landskappingini hini trý árini, og í steypakappingini var liðið í finaluni øll fýra árini. Úrtøkan var tvær ferðir gull og tvær ferðir silvur.
Nú fer Heðin Askham undir avbjóðingina við HB stýrisvølin, og hann veit, at tað verður roknað við, at liðið skal vinna nógv, og at undanmenninir í sessinum hava verið ódrúgvir honum:
-Tú verður skarpari av at arbeiða undir trýsti. So leingi, sum spælararnir bakka upp, so hava fyrstu úrslitini ikki so nógv at siga, um tey ikki skuldu verið so góð, heldur Heðin Askham.
Tað kann gott vera, at HB avbjóðingin í fyrsta umfari tykist stór. Sammett við undanfarnu trý árini ber tað illa til at tað skal ganga verri. Í so máta fer tað at raka meinari hjá heimaliðnum, um tað ikki eydnast at vinna fulla úrtøku.
Símun Samuelsen og Jógvan Rói Davidsen hjá HB eru langtíðarskaddir. Orsaka av skaða í lærkrikanum er tað ivasamt, um Gunnar Haraldsen verður førur fyri at spæla. Levi Hanssen er burturstaddur.
Hjá EB/Streymi eru Arnbjørn Hansen og Arnar Dam langtíðarskaddir.
