Sosialurin hevur gjørt eitt nýtt sjónvarps- og útvarpsblað, nevnt VARPIÐ, sum verður at fáa saman við Sosialinum hvønn fríggjadag. Fyrsta VARPIÐ verður at fáa við fríggjadags Sosialinum, sum verður at fáa í annaðkvøld.
Sosialurin hevur leingi havt ætlanir um at bøta um Hygg og Hoyr, sum hevur verið í Sosialinum í nógv ár. Javnan hava fólk heitt á okkum um at fáa aðrar rásir við, enn tær, sum Rás Tórshavn hevur víst.
Tá nú Televarpið er farið at senda, og Rás Tórshavn er farin í søguna, hava vit samstundis nýtt høvi at gera broytingarnar.
Í blaðnum verða skráir fyri allar rásirnar, sum Televarpið sendir ? og samstundis fáa øll onnur, ið hava parabolsjónvarp gleði av blaðnum, tí tey mongu, ið eitt nú hava hald frá CanalDigital, síggja so at siga allar rásirnar, ið Televarpið hevur á síni skrá.
Blaðið verður ikki ein partur av Sosialinum, soleiðis sum Hygg og Hoyr hevur verið, men blaðið verður prentað fyri seg. Tað verður prentað á tjykkri pappír til tess at økja um góðskuna. Eisini verður blaðið skorið, so tað verður eitt sindur minni enn Sosialurin, og tað verður heft í rygginum.
Sostatt er talan um eitt blað, sum verður tikið úr Sosialinum og sum kann liggja á borðinum framman fyri sjónvarpið alla vikuna ? og tú kanst fylgja við, hvat ið sent verður á øllum rásunum.
Sjónvarp Føroya, Útvarp Føroya, Rás2 og Lindin verða sjálvsagdur partur av blaðnum, sum eisini hevur umrøður av ávísum sendingum og filmum.
