Óvanligir nógvir grindahvalir hava verið á sæð kring Ísland í ár og aftur í dag høvdu íslendingar vitjan av einum bólki. Á heimasíðuni hjá Morgunblaðnum verður í dag skrivað um, at 40 grindahvalir svumu í víkini í Akureyri í dag.
- Vit hava aldrin áður sæð ein so stóran bólk í økinum. Vanliga mugu vit longur frá landi fyri at fáa eyga á hvalum, sigur Tess Hudson, havlívfrøðingur við mbl.is.
Gísli A. Víkingsson, íslendskur hvalafrøðingur, sigur við Morgunblaðið, at tað er ikki óvanligt, at grindahvalir nærkast landi og vísir til Føroyar. Hann vísir tó á, at óvanliga nógvur hvalir hevur verið at sæð í Íslandi í summar.
- Nógvur grindahvalur hevur verið at sæð í firðunum í summar og eisini døglingar. Men tað er ógjørligt at siga hvat orsøkin er til hetta, sigur Gísli A. Víkingsson.
