- Trolmenn rinda óhugnaliga nógvan pening til olju. Hetta fer slett ikki at bera til. Tað fer heldur ikki at bera til, at línumenn skulu rinda gjald fyri reiðskap. Menn rýma í heilum av føroyskum skipum og fáa sær kjans við eitt nú norðmonnum.
Tað sigur Grímur Hammer, sum nú stillar upp til formansvalið í Føroya Fiskimannafelag.
Hann stúrir fyri, at Føroyar við verandi gongd fara at standa eftir við ongum fiskimonnum til eitt nú línuskip, partrolarar og lemmatrolarar.
Tað var ikki nøkur løtt avgerð hjá Grími at taka, tá hann fekk áheitanir um at stilla upp móti sitandi felagsformanni, Jan Højgaard.
Grímur Hammer arbeiðir nevniliga á skrivstovuni hjá Fiskimannafelagnum.
- Tá tað var greitt, at eg fór at stilla upp, fekk eg at vita frá formanninum, at eg skuldi ikki taka telefonina á skrivstovuni, meðan valið fer fram.
Sjálvur heldur Grímur, at tað er í fínasta lagi, at hann ikki tekur telefonina, so hann møguliga kann ávirka limir, sum ringja til felagið.
- Hetta skilji eg væl. Jan er formaður, og hann hevur sjálvandi sínar uppgávur - eisini, meðan valið fer fram. Hinvegin er tað eitt gott hugskot, at næstformaðurin, Sámal Poulsen, situr her og tekur telefonina um dagarnar, nú val er.
Men, hvussu væntar Grímur, at viðurskiftini verða millum hann og formannin, um felagsformaðurin eftir 1. februar 2013 framvegis eitur Jan Højgaard.
- Um so verður, vænti eg ikki, at eg eri í starvi her eftir 1. februar, men tað havi eg einki fingið at vita um enn. Hetta er sjálvandi ein spurningur, sum formaðurin ikki avger einsamallur, men leiðslan í felagnum, leggur hann aftrat.
Grímur Hammar hevur fleiri hjartamál, nú hann hevur latið seg stillað upp. Millum hjartamálini er at halda fast um vunnin rættindi hjá fiskimonnum og vinna innaftur mist rættindi, sum hann heldur hava avgerandi týdning fyri inntøkur fiskimanna.
- Hetta hevur verið ein trupul tíð, men ikki minst í slíkum tíðum er avgerandi, at fiskimenn standa saman, sigur valevnið.
Portalurin fer eisini at endurgeva hini bæði valevnini, Jan Højgaard og Sakaris Zachariassen, fyri ymiskt av tí, teir hava at siga, nú formansval er í Føroya Fiskimannafelag.
