Tað endaði við 4-1 heimasigri, tá ið AB í kvøld hevði vitjan av ÍF. Úrslitið ber við sær, at AB liggur væl á kósini ímóti bestu deildini, meðan tapið í kvøld ber við sær, at ÍF møguleikin at røkka heiðursmerkjaplássi er heilt lítil.
AB hevur 53 stig og er trý stig aftanfyri oddaliðið Skála og níggju stig frammanfyri B71, sum er 11 stig frammanfyri ÍF og 12 stig frammanfyri Víking.
Hetta var áttanda ferðin á rað. At AB fór av vøllinum við fullari úrtøku. AB hevur ikki tapt síðani 14. juni, tá ið skálamenn fóru av Argjum við 1-0 sigri.
Tíggju minuttir undan steðginum skoraði AB tvey mál. Tað fyrra var Gunnar Reynslág meistari fyri, og tað seinna skoraði Brian Jakobsen. Bæði Gunnar Reynslág og Brian Jakobsen hava higartil í ár skorað fimm mál fyri AB.
Ein minutt undan steðginum økti Dánjal Danielsen um munin til 3-0, og sjey minuttir eftir steðgin var Dánjal Danielsen aftur upp á spæl. Hann hevur higartil í ár skorað 15 mál.
13 minuttir undan leikloki minkaði ÍF um munin til 4-1. Málskjútti var Markus á Lakjuni, sum varð skiftur inn, tá ið ein lítil tími var farin. Hetta var fyrsta málið yvirhøvur hjá Markusi á Lakjuni í næstbestu deildini, har hann í kvøld var fyri 31. ferð, veit FaroeSoccer at siga.
Næsti dystur hjá ÍF verður 13. september, tá ið EB/Streymur verður gestur í Fløtugerði.
Næsti dystur hjá AB verður 14. september, tá ið AB fer at spæla á útivølli ímóti Víkingi.
