Fýra partrolarapør eru til fiskiskap eftir upsa, og tey flestu koma inn at landa í næstu viku. Væntandi fer okkurt parið út um vikuskiftið.
Tvey partrolarapør fiska framvegis gulllaks. Í ár er vertíðin longd, tí tað eru bara tvey pør á hesi veiði í vertíðini í ár í mun til, at pørini plagdu at vera trý.
Á Fiskamarknaði Føroya vita tey at siga, at ein djúpvatnstrolari , sum fiskar ísfisk, er á svartkalvaveiði. Teir koma væntandi inn at landa í næstu viku.
- Jákup Sverri ger heyst yvirlitstrolingar á Føroyabanka, og ein frystitrolari er á svartkalvaveiði í Eysturgrønlandi.
Tríggir av teimum smáu trolbátunum eru norðanfyri. Teir fáa mest av hýsu, toski og so nakað av flatfiski. Allir koma inn at landa í næstu viku.
Tvey garnaskip fiska svartkalva, og tvey fiska havtasku. Á svartkalvaveiði hava skipini brúkiligan fiskiskap, men á havtaskuveiði er fiskiskapurin misjavnur.
- Øll garnaskipini koma inn at landa í næstu viku, verður lagt aftrat á Fiskamarknaði Føroya.