Vánaligt sýni var eftir øllum at døma orsøkin til, at libyska flogfarið datt niður í floghavnini í Tripoli. Bara ein niðurlendskur smádrongur slapp livandi frá vanlukkuni. Amerikanska sjónvarpið CNN sigur frá sínum keldum, at mjørki og sandrok gjørdu sýnið so vánaligt, at flogskiparin valdi at sløkkja sjálvstýraran og at stýra sjálvur.
Beint áðrenn flogfarið skuldi seta seg, skilti flogskiparin, at hann var í trupulleikum. Hann royndi at taka flogfarið uppaftur, so hann kundi gera eina aðra roynd at lenda. Men tá var ov seint.
Sambært keldunum hjá CNN sigur hendan frágreiðingin, hví flogfarið fór so illa, tá tað bar við vøllin.
