- Vit hava verið í synagogunum og biðið um, at Sharon skal ikki koma fyri seg aftur, segði Itamar Ben Gvir, sum er ein av leiðarunum í tí víðgongda jødiska felagsskapinum Kach, sum er bannaður í Ísrael.
- Sharon hevur ábyrgdina av, at fleiri túsund jødar liva í sorg, legði Itamar Ben Gvir afturat og sipaði til, at forsætisráðharrin fyrr í ár noyddi umleið 8.000 jødiskar niðursetumenn úr Gaza-geiranum.
Men palestinararnir, sum hava yvirtikið valdið í geiranum, harmaðust heldur ikki um, at ísraelski forsætisráðharrin var fluttur á sjúkrahús. Nógvir víðgongdir palestinar runnu út á gøturnar sunnukvøldið og fagnaðu tíðindunum, samstundis sum teir róptu bønarorð til Allah um, at Sharon skuldi doyggja, skrivar AP.
Sharon bleiv fluttur á eitt sjúkrahús í Jerusalem seinnapartin sunnudagin. Hann hevði kent seg illa, og á veg til sjúkrahúsið misti hann vitið. Læknarnir staðfestu, at hann hevði havt ein hjartatilburð. Seinni um kvøldið vistu ísraelsku fjølmiðlarnir tó at siga, at Sharon var batnaður, og at hann var komin aftur á føtur. Í gjár skuldi hann til ymsar kanningar á sjúkrahúsinum, áðrenn hann kundi sleppa útaftur.
Víðgongdir jødar og víðgongdir palestinar vónaðu, at Sharon doyði av hjartatilburðinum, sum hann fekk sunnukvøldið
Mynd: Reuters
