Smyril úr Vági heldur stásið við líka. 6-mannafarið úr Vági vann á norðoyastevnu í Klaksvík fyri tveimum vikum síðani, og hann vann á sundalagsstevnu í Hvalvík fyri einari viku síðani.
Í fagrastu róðrarlíkindum bjóðaði Hvessingur enn einaferð av ídag. Tær báðu undanfarnu ferðirnar hevur Páll Fangi úr Klaksvík eisini verið við. Í dag var Páll Fangi ikki við, og tað kann væl vera, at hann ikki verður við tær næstu ferðirnar. Orsøkin er, at onkrir av manningini eru farnir av landinum.
Á Skálafjørðinum kappaðust Smyril og Hvessingur um fremsta plássið, meðan Gongurólvur og Fortuna kappaðust um bronsuplássið.
Eina løtu sá tað út til, at Hvessingur fór at bjóða vágbingum av, men í endaspurtinum var eingin ivi. Teir á Smyrli áttu flestu knoturnar, og tá ið teir fóru um málið var fjarstøðan ein bátslongd ella so.
Fortuna úr Vestmanna var klárt nummar trý í kappingini við Gongurólv um triðja plássið.
1 Smyril 04:50:20
2 Hvessingur 04:52:10
3 Fortuna 04:59:19
4 Gongurólvur 05:02:12
