Tað var í nátt, at partrolarin, Skoraberg, sigldi á land sunnarlaga og eystanvert á Kalsoynni, og her stendur skipið framvegis.
Fyrr í morgun visti løgreglan at siga, at fimm av manningini vóru fluttir av skipinum, og at stýrimaðurin og skiparin framvegis vóru umborð.
Men, nú er eingin av manningini eftir umborð í Skorabergi.
Bjargingarbáturin, Ziska og Brimil, eru framvegis á leiðini, har skipið stendur.
Hjá MRCC siga tey, at kavarar hava verið niðri og staðfest, at hol er ikki á skipinum, og tað er heldur eingin sjógvur í Skorabergi.
Veðrið er gott, og nú verður bíðað eftir, at tað fer at fløða. Tá fer Brimil væntandi at gera eina roynd at toga skipið avaftur.
- Vit halda, at útlitini at fáa skipið av aftur eru góð, men einki kann sigast við vissu, fyrr enn skipið er leyst úr landi aftur.
##med2##
Hjá MRCC vita tey at siga, at skipið hevur ligið umleið 30 stig, so tað stendur rættiliga fast har frammi.
- Hinvegin er djúpt út fyri, har skipið stendur, og hetta skuldi - alt annað líka - verið ein stórur fyrimunur, tá skipið skal togast avaftur.
Sum skilst á MRCC, skuldi flóð verið tíðliga seinnapartin, og tá er væntandi, at ein roynd verður gjørt at toga skipið.
Skoraberg var á veg til lands av túri, tá skipið fór á land nakað sunnanfyri Syðradal á Kalsoynni. Teir partrola saman við Fuglbergi.
