Amerikanska uttanríkisráðið biður amerikanskar ríkisborgarar í Hvítarusslandi um at fara av landinum alt fyri eitt.
Orsøkin er økt hernaðarligt virksemi við markið hjá Hvítarusslandi til Ukraina.
Tað upplýsir ráðið í nátt okkara tíð.
– Amerikanskir ríkisborgarar í Hvítarusslandi eiga at fara av landinum alt fyri eitt, skrivar ráðið í eini fráboðan á Facebooksíðu síni.
Boðini koma tvær vikur eftir, at USA bað familjurnar hjá amerikonsku stjórnarstarvsfólkum í Hvítarusslandi um at fara av landinum.
Samstundis ávaraði amerikanska uttanríkisráðið amerikanarar ímóti at fara til Hvítarusslands, sum er ein av tættastu sameindu Russlands.
– Vegna økt og í stóran mun óvanliga russiska hernaðarliga virksemi nærindis markinum til Ukraina eiga amerikanskir ríkisborgarar, sum eru í ella umhugsa at fara til Hvítarusslands, at verða varugir við, at ikki ber til at siga nakað um støðuna, skrivaði ráðið í einum dagførdum ferðaboðum 31. januar.
Í gjár segði amerikanski uttanríkisráðharrin, Anthony Blinken, at USA stúrir fyri, at Russlandi kann leypa á Ukraina longu ein av komandi døgunum.
– Vit eru sera stúrin fyri , at Russland kann leypa á Ukraina longu í hesi vikuni, segði Blinken við fronsku sjónvarpsstøðina France 24 sambært tíðindastovuni dpa.
Fyrr í gjár segði Pentagon-talsmaðurin John Kirby við CNN, at russiski forsetin, Vladimir Putin, »økir talið av hermonnum við markið til Ukraina og Hvítarussland«.
– Tað er væl oman fyri 100.000, var niðurstøðan hjá Kirby.
Sambært Pentagon-talsmanninum arbeiðir USA framvegis út frá sannføringini um, at Putin enn ikki hevur tikið endaliga støðu til at gera innrás í Ukraina.
/ritzau/
##med2##
