Løgreglan hevur úr at gera av ávirkaðum fólki, sum halda til við bussskýlini í Steinatúni í Havn. Í gjár varð løgreglan boðsend tvær ferðir, og báðu ferðina førdi tað til handtøkur. Tað var klokkan 13:30 og klokkan 17:30.
Vaktleiðarin á politistøðin í Havn greiðir frá, at tað eru somu fólkini, tað snýr seg um, og at teir persónar soleiðis fingu bót fyri brot á skilhaldsreglarnar, tí tey vístu harðligan atburð. Bótin er 3.000 krónur.
Vaktleiðarin sigur, at fólk kenna seg ótrygg av teimum, og tað ofta eru trupulleikar, tey hava innanhýsis, sum førir til harðligan atburð.
– Vit hava ikki annan møguleika enn at handtaka tey fyri at fáa tey burtur – og geva teimum bót. Vit hava ikki manning at mansuppdekka tey, sigur vaktleiðarin.
– Men so eru tey aftur, sigur hann.
Spurdur hvussu tað gongur at fáa tey at rinda bøturnar, sigur vaktleiðarin, at tað gongur ill, og at ofta verður tað til avsonining í staðin, at tey mugu inn at sita fyri at fáa avgreitt bøturnar.
Persónur, fyrradagin varð tikin á flogvøllinum fyri at smugla hassj innvortis, er nú leyslatin aftur. Í gjár varð bíða, til hann hevði verið á wc, og til rúsevnið var komið afturaftur. Og tað kom tað so. Talan var um umleið 50 gram av hassji.
– Tað verður mett at vera til egna nýtslu, og tað fekk viðkomandi 7.000 krónur í bót fyri, sigur vaktleiðarin á politstøðini.
