Atli Hansen, tingmaður í Sambandsflokkinum og varamaður hjá Edmund Joensen í tinginum, var staddur á fiskileið, tá vit hitta hann í telefonini.
Hetta var fyrrapartin í gjár, og Atli Hansen væntar ikki, at hann verður aftur við hús fyrr enn seinnapartin.
Hann er ikki fegin um at tosa við Sosialin í fartelefonini, tí sum hann ofta áður hevur tikið til, hvørt mansbarn í Havn situr og lurtar eftir tí, sum verður flutt um fartelefon.Hann endurtekur tí bert tað, sum hann hevur sagt áður:
Tað er ikki ein parlamentarisk ónøgd, sum gevur Edmundi Joensen høvi at útskriva val, sigur Atli Hansen og ásannar, at tað órógvar stóra arbeiðið, sum hevur verið gjørt í tinginum, og sum nú dettur burtur.
Eg haldi ikki, at tað var rætt av honum at fara, men vit kundu ikki forða fyri tí.Hann hevur fullan rætt at fara úr Tinganesi.
Var tað kanska ikki besta loysnin fyri flokkin, at Edmund Joensen fer frá?
Hvørt tað er best fyri flokkin, kann eg ikki svara, tí eg veit ikki, hvat eg best fyri flokkin, fyrr enn aftaná landsfundin, sigur Ali Hansen og setir motorin í gongd og stimar víðari á fiskileið.
Tað kunnu koma nógvar hendingar á leiðini áðrenn landsfundurin hjá Sambandsflokkinum hevur avgjørt, hvør nýggi formaðurin verður.
Tað hevur ljóðað, at kampval verður, men tað fæst ikki greiða á, fyrr enn á sjálvum uppstllingarfundinum í Læraraskúlahøllini í kvøld.
Hinvegin, so stendur fast, at reglurnar hjá Sambandsflokkinum eru soleiðis, at eitt møguligt uppskot um val av formansevni kann setast fram beint áðrenn farið verður til atkvøðugreiðslu. Sostatt veit eingin í flokkinum, hvussu úrslitið verður, fyrr enn á sjálvum fundinum, sigur ein sambandslimur við Sosialin.
