Føroya Landsorkestur, sum er orkestur undir Musikkskúlaskipanini, fyrireikar seg í hesum døgum til konsertferð til Kekkia og Týsklands. Orkestrið hevur vant dúliga, og síðstu venjingarnar verða nú, áðrenn orkestrið fer í flúgvaran mikumorgunin, sigur Johan Hentze frá orkestrinum.
FLO, sum orkestrið verður nevnt, verður við á orkesturdøgunum, sum blásilærarar og Tórshavnar Musikkskúli skipa fyri og í tí sambandi spælir orkestrið á konsertin í Norðurlandahúsinum í annaðkvøld, týskvøldið.
Á uttanlandsferðini gongur leiðin fyrst til býin, Liberec, norðanliga í Kekkia. Fyrsta konsertin verður í Koloseum Liberec hóskvøldið saman við næmingum úr musikkskúlanum har. Fríggjadagin spælir landsorkestrið tvær konsertir á skúlum í Prag, og í sama viðfangi verður hugt at søguliga býnum. Leygardagin verður farið til Suðurtýsklands at spæla í einum býi, nevndur Hoyerswerda og sunnudagin kemur orkestrið heimaftur.
Føroya Landsorkestur varð sett á stovn í 2010 og einir 60 blásarar og slagverksspælarar úr øllum landinum hava vunnið sær pláss í orkestrinum, sum kann sigast at vera eitt unglingalandslið hjá Føroya Musikkskúla!
Fleiri blásilærarar og slagverkslærarar samstarva um orkestrið og dirigentur er Bernharður Wilkinson, sum eisini stjórnar Føroya Symfoniorkestri. - Krøvini til tónleikararnar eru høg, næstan sum í einum professionellum orkestri, sigur sigur Johan Hentze. - Nótarnir eru rímuliga krevjandi, so nógv má venjast heima, leggur hann afturat.
Tað er eisini eitt krav, at atburðurin er virðiligur í orkestrinum, at møtt verður í góðari tíð, so ljóðførini eru hitað upp og klárt er at spæla, tá venjingin byrjar!
- Alt hetta er við til at ala góðar tónleikarar upp, sum taka tað í álvara og støðið á orkestrinum er heilt gott, sigur hann. FLO hevur áður verið á konsertferðum í Íslandi, sum eydnaðust sera væl, men hesa ferð verður farið eitt sindur longur burtur og til eitt land við langari siðvenju innan klassiskan tónleik.
|
