Russiska tíðindastovan Tass veit at siga, at ein ukrainsk rakett er dottin niður í Hvítarusslandi í dag. Tíðindastovan Belta í Hvítarusslandi skrivar eisini um hendingina.
Sagt verður, at talan er um eina S-300, ið er ein loftverjurakett, sum verður brúkt til at skjóta niður aðrar rakettir og flogfør. Tað var ein líknandi rakett, sum datt niður í Póllandi í november.
Í dag hava russar skotið fleiri rakettir eftir málum í Ukraina, og her hava ukrainar longu sagt, at teir hava skotið niður tær flestu russisku rakettirnar, áðrenn tær raktu málum.
Reuters, sum endurgevur tíðindastovuna Belta, veit at siga, at verjumálaráðið í landinum hevur sett eina kanning í verk.
Kanningarfólk í Hvítarusslandi arbeiða nú á staðnum, har rakettin datt niður og forseti landsins, Aleksandr Lukasjenko, er kunnaður um hendingina, verður lagt aftrat.
##med2##
Dagført:
Tað seinasta nýggja er, at verjumálaráðið í Hvítarusslandi sigur, at ukrainska loftverjurakettin varð skotin niður klokkan 10 í morgun, lokala tíð. Tað veit tíðindastovan Reuters at siga.
Einki er frætt um persónsskaðar.
- Eingin orsøk er til stúran. Tíverri hendir slíkt, sigur hernaðarkommiserurin í regiónini, Oleg Konovalov, sambært Reuters.
