Sambært ukrainskum myndugleikum og tíðindamiðlum í býnum Mariupol hava russisk loftálop fullkomiliga oyðilagt eitt barnasjúkrahús í býnum.
Áhaldandi og hørðu álopini á býin gera, at umstøðurnar í býnum sambært MSF, sum er Læknar uttan Landamørk, eru vorðnar ein menniskjanslig vanlukka.
Sambært lokalari sjónvarpsrás í Mariupol eru mong deyð og særd í álopum á býin seinnapartin í dag.
Bumbingin hevur elvt til stórar oyðileggingar, og eitt nú er eitt barnasjúkrahús, sum eisini hevði eina føðideild, farið í knús.
##med2##
Reuters, sum endurgevur guvernørin í Donetsk-landslutinum, Pavlo Kyrlenko, veit at siga, at loftálopið á barnasjúkrahúsið í býnum fór fram júst undir vápnahvíldini, sum boðað varð frá frammanundan.
Forsetin í Ukraina, Volodymyr Zelenskyj, fordømir álopið og sigur, at hetta var eitt beinleiðis álop á barnasjúkrahúsið og føðideildina, og hann vísir á, at her liggja bæði børn og vaksin í skeljum.
- Hetta er andstyggiligt, sigur hann.
Á Telegram spyr forsetin eisini, hvussu leingi heimurin ætlar at vera samsekur í yvirgangi - ella terror, sum Volodymyr Zelenskyj málber seg.
Í gjár søgdu myndugleikarnir í Ukraina, at heili 61 sjúkrahús í landinum eru óvirkin orsakað av russiskum álopum, og landið hevur ferð eftir ferð ákært Russland fyri bevíst at leypa á sivil mál í Ukraina.
##med3##
