Ferðalagið fór úr Føroyum til Limerick í Írlandi í gjár, og í dag, í morgin og sunnudagin skal liðið spæla tilsamans tríggjar dystir í eini Challenge Trophy-kapping. Dystirnir liggja soleiðis, at mótstøðuliðið í kvøld er Írland, í morgin Ongland og sunnudagin Georgia.
– Málið hjá okkum er, at vit ætla at vinna kappingina. Vit ætla okkum við vissu at vinna á Onglandi og Írlandi, og hóast vit ikki vita so nógv um Georgia, fara vit eisini eftir at vinna tann dystin. Greiði málsetningurin er at gerast nummar eitt í kappingini, sigur Kári Nielsen, sum saman við Dia Midjord venur U23-landsliðið.
Hann letur væl at ungu spælarunum, sum hava verið sera spentir upp á uppgávuna og tí eisini hava verið stak ídnir til venjing. Teir hava møtt væl upp, tá tað hevur borið teimum til og dystir í heimligu kappingini ikki eru komnir í vegin.
– Vit hava havt regluligar samlingar mánakvøld, og annars hava vit lagað okkum eftir dystarskránni. At vit hava verið saman eina ferð um vikuna, er kanska meira, enn vit nakrantíð hava gjørt fyrr, men menn eru spentir og ganga høgt upp í tað, sigur Kári Nielsen.
Um tað tekniskt ber til, fer Hondbóltssambandið at royna at vísa dystirnar beinleiðis á heimasíðu síni, hsf.fo.
