Norska kringvarpið NRK veit í dag at siga, at tríggjar týskar fregattir skulu verja norskan olju-og gassútbúnað.
Skipini eru í løtuni við í einari hernaðarvenjing í Norðurnoregi, nevnd "Heimdall", og tá venjingin er liðug, verða skipini verandi í norskum øki.
Sambært NRK er hetta ein týsk hernaðarvenjing við Andøya, og her venja bæði týski herurin, sjóverja og loftverja. Noreg luttekur eisini í venjingini, og tilsamans eru eini 1200 herfólk við í venjingini.
Tær tríggjar týsku fregattirnar, sum eru við í venjingini, eru Rheinland-Pfalz, Schleswig-Holstein og Mecklenburg-Vorpommern.
Týska verjan hevur bjóðað Noregi, at skipini kunnu vera verandi í norskum sjógvi, har tey kunnu halda vakt og sigla kring um við norskan olju-og gassútbúnað.
Hetta hevur NRK fingið upplýst í norska verjumálaráðnum.
Eftir at Russland leyp á Ukraina hin 24. februar í ár, eru olja og gass vorðið ein partur av stríðnum millum Russland og vesturheimin. Meðan Evropa hevur roynt at gera seg leyst av russiskum gassi, hava russar á hinari síðuni minkað um nøgdina av gassi til Evropa.
Hetta hevur gjørt, at Noreg í løtuni er størsti veitari av náttúrugassi til Evropa, samstundis sum norskur olju-og gassútbúnaður eru vorðin eitt mál fyri álopum - serliga eftir, at gassrørleiðingarnar, Nord Stream 1 og 2, vóru fyri álopum.
- Síðan hendingina í Eystursjónum hevur tilbúgvingin í norskum øki verið skerpað, veit NRK at siga.
##med2##
