- Tvey ísfiskalínuskip, sum fiska undir Føroyum, koma inn at landa mánadagin. Tey hava mest av toski, longu og brosmu.
Tað vita tey á Fiskamarknaði Føroya at siga. Lagt verður aftrat, at eitt annað ísfiskalínuskip eisini er undir Føroyum og fær mest av longu og brosmu.
- Tvey ísfiskalínuskip fiska í íslendskum sjógvi, og annað skipið kemur heim at landa síðst í næstu viku. Hitt skipið landar neyvan í vikuni sum kemur.
Aftrat hesum fiska tvey frystilínuskip í føroyskum sjógvi, og eitt føroyskt frystilínuskip fiskar í íslendskum sjógvi.
Á Fiskamarknaði Føroya vita tey eisini at siga, at eitt frystilínuskip og eitt ísfiskalínuskip eru ávegis til Grønlands at fiska.
Um útlitini til útróður verður sagt, at streymurin verður hampiligur í næstu viku, og veðrið verður gott. Tí er eisini væntandi, at nakað verður av útróðri.
- Men, hetta er vánalig tíð til útróður, verður lagt aftrat.
