SUPERLIGAN
Tað kemur sjáldan fyri, at úrslitini laga seg soleiðis, sum tey gjørdu í donsku superliguni hesa ferð. Fimm av teimum seks dystunum endaðu við javnleiki. Einasti vinnarin varð funnin í Brøndby, har heimaliðið vann á Horsens og harvið legði seg á næstfremsta plássið. Nú er munurin fram til FCK fýra stig.
Føroyski landsliðsspælarin var inntil tað restaði eitt korter á miðvøllinum í vinstru hjá Horsens. Hóast tólv av Brøndby spælarunum ikki vóru tøkir orsaka av skaðum, so var heimaliðið greitt omaná. Úrslitið var 4-1, men Brøndby hevði møguleikar at skjóta í minsta lagið fýra mál afturat. Hóast teir taptu í Brøndby, so eru teir í Horsens framvegis á áttanda plássinum.
Rógvi Jacobsen var á vøllinum seinastu lítlu løtuna, tá ið SønderjyskE megnaði 1-1 á útivølli í Viborg. Talan var um ógvuliga gott úrslit fyri SønderjyskE, sum er botnlið móti Viborg, sum nú er á triðja plássi.
Viborg legði seg á odda í 87. minutti. Minuttin seinni varð Rógvi Jacobsen settur inn í álopið hjá SønderjyskE, og uppaftur ein minutt seinni eydnaðist tað teimum at javna til 1-1, sum eisini gjørdist endaliga úrslitið.
FCK er framvegis oddalið, hóast teir hesa ferð ikki megnaðu meiri enn 1-1 í Parkini móti OB. Hetta var triði útidysturin hjá OB í hesum kappingarárinum, og teir hava framvegis ikki tapt á útivølli.
Súni Olsen er framvegis skaddur, og hann var tískil ikki á AaB liðnum, sum á heimavølli spældi 2-2 móti FCM. Hetta var eisini úrslitið í jyska klassikaranum og hesa ferð botnuppgerðini millum AGF og Esbjerg, sum framvegis er niðanfyri strikuna.
Leygardagin hevði FCN vitjan í Farum av Silkeborg. Heimaliðið legði seg á odda 2-0, og alt bendi á, at teir vóru á veg móti stórsigri. Men so vendi, og tað endaði við, at Silkeborg fekk javna til 2-2, og teir høvdu síðstu løtuna møguleika at skora sigursmálið, uttan at tað eydnaðist.
