Donald Trump hevur elvt til vreiði við at vanvirða hægstu hernaðarvirðislønina í Amerika. Umstrídda útsøgn hansara hevði hann fríggjadagin undan valfundinum í sveiggj-statinum Pennsylvania um vikuskiftið.
Tað var á einum fundi við jødiskar stuðlar í New Jersey, at Trump kom við útsøgnini, sum varð stílað til Miriam Adelson - einkjuna hjá miljarderinum Sheldon Adelson.
Adelson-hjúnini hava verið millum fremstu fíggjarligu stuðlarnar hjá republikanarunum í nøkur ár. Í 2018 gav Trump Miriam Anderson forsetaheiðursmerkið fyri frælsi.
Undir fundinum segði Trump við Adelson, at heiðursmerkið, sum hon fekk, er týdningarmiklari enn heiðursmerkið, sum er hægsti amerikanski hernaðarligi heiðurin, sum verður latin í navninum hjá kongressini.
- Heiðursmerkið, sum tú fekst, er faktiskt nógv betri tí øll, sum fáa kongressheiðursmerkið, eru hermenn. Teir eru antin í øgiliga ringum standi, tí teir eru skotnir fleiri ferðir ella eru teir deyðir, segði Trump og legði afturat:
- Í mun til tey ert tú ein frísk og snøgg kvinna.
Útsøgnin hevur elvt til vreiði - ikki minst millum amerikanskar krígsveteranar.
Ein talsmaður fyri forsetavalevnið hjá demokratunum, Kamala Harris, hevur eisini svarað.
- Trump veit ikki, hvussu tað er at tæna øðrum enn sær sjálvum, stendur í fráboðan frá hennara valstríðsfólkum.
Bæði Trump og Harris vitja í Pennsylvania um vikuskiftið, sum er ein av týdningarmestu svingstatunum á forsetavalinum 5. november.
Trump fer at tala við stuðlum í Wilkes-Barre í kvøld, meðan Harris byrjar ein bussferð í Pittsburgh í morgin.
Tey bæði valevnini stríðast um 19 valfólk í Pennsylvania, har úrslitið av valinum langt frá er greitt frammanundan.
Tað sama er galdandi fyri tveir aðrar sveiggjstatir í sokallaða rustbeltinum - Michigan og Wisconsin.
Ein sambering av fleiri veljarakanningum, sum heimasíðan FiveThirtyEight hevur gjørt, gevur Harris eina leiðslu uppá umleið tvey prosentstig í Pennsylvania.
/ritzau/AFP
