Týdningarmesta kjarnorkuríkingarverkið í Iran er fullkomiliga oyðilagt av álopinum frá USA á trý kjarnorkuverk í Iran.
Tað sigur amerikanski forsetin, Donald Trump, í sjónvarpsrøðu.
- Loftálopini vóru ein stórbær hernaðarlig eydna. Týdningarmesta kjarnorkuríkingarverkið í Iran er fullkomiliga og totalt oyðilagt, sigur forsetin.
Fyrr í nátt framdi USA loftálop móti teimum trimum kjarnorkuverkunum Fordow, Natanz og Isfahan í Iran.
Hetta er fyrstu ferð, at USA legst beinleiðis uppí ósemjuna, eftir at Ísrael fríggjakvøldið í síðstu viku leyp á fleiri hernaðarmál í Iran.
Trump sigur eisini í røðu síni í nátt, at Iran nú skal binda frið. Annars fer USA eftir øðrum málum í Iran, sigur forsetin.
- Antin verður friður, ella verður tað ein nógv størri sorgarleikur fyri Iran, enn vit hava verið vitni til seinastu átta dagarnar. Minnist til, at tað eru nógv mál eftir, sigur Trump og leggur afturat:
- Um ikki, so kemur friðurin skjótt, vit fara eftir hinum málunum við neyvleika, skjótleika og dugnaskapi.
Eftir røðuna ávarar Trump Iran ímóti at hevna seg móti USA.
- Eitt og hvørt slag av hevndargerðum hjá Iran móti USA verður móttikið við nógv størri megi enn tað, vit vóru vitni til í kvøld, skrivar Trump í einum uppslagi á sínum sosiala miðli, Truth Social.
Fyrr í nátt segði amerikanski forsetin við Fox News, at USA brúkti seks sokallaðar bunkerbusterbumbur ímóti kjarnorkuverkinum í Fordow undir álopinum, meðan 30 Tomahawk-rakettir vórðu brúktar móti hinum kjarnorkuverkunum.
Amerikansku bunkarabumburnar viga 13,6 tons og kunnu grava seg 61 metrar niður í jørðina, áðrenn tær bresta. Bumban verður mett at vera tað kraftmiklasta vanliga vápnið.
Í røðuni, sum vardi næstan fýra minuttir, gav Donald Trump ikki fleiri smálutir um álopini á tey trý kjarnorkuverkini.
Hann boðaði tó frá, at tíðindafundur verður í Pentagon seinnapartin sunnudagin klokkan 13 okkara tíð.
- Í morgin klokkan 7:00 hava Caine generalur og verjumálaráðharrin Pete Hegseth tíðindafund í Pentagon, sigur Trump.
USA og Iran hava seinastu mánaðirnar samráðst um at fáa semju um kjarnorkuætlanina hjá Iran. Síðani ósemjan brast á millum Ísrael og Iran, eru samráðingarnar millum USA og Iran steðgaðar upp.
/Ritzau/
