- Partrolararnir koma inn at landa, sum næsta vika gongur. Fiskiskapurin eftir upsa er smáligur í mun til tíðina, sum skuldi verið góð til upsa.
Tað veit Fiskamarknaður Føroya at siga.
- Allir djúpvatnstrolararnir, sum vanliga eru á ísfiskaveiði, liggja, men helst fer onkur út um vikuskiftið. Ein fiskar á djúpum vatni og landar niðri, ein fiskar svartkalva og frystur veiðina umborð.
Um smáu trolbátarnar veit marknaðurin at siga, at fimm fiska havtasku á Skeivabanka, og fiskiskapurin er hampiligur.
- Teir flestu trolbátarnir koma inn at landa mánadagin.
Lagt verður aftrat, at tvey garnaskip eru á svartkalvaveiði, og eitt av hesum skipum kemur inn at landa mánadagin. Hitt skipið landar helst seinni í vikuni.
- Fiskiskapurin hjá garnaskipunum er smáligur, veit Fiskamarknaður Føroya at siga.
