Um tveir mánaðir fer bólturin aftur á rull. Stórsteypadysturin millum meistararnar í KÍ og steypavinnararnar í B36 er settur at vera leygardagin 26. februar, og fyrsta umfar í landskappingini verður fyrsta vikuskiftið í mars.
Feløgini eru farin undir fyrireikingarnar til nýggja kappingarárið, men í trimum feløgum er tað ikki greitt enn, hvør fer at vera høvuðsvenjari. Hesum verður greiða ivaleyst fingin á heilt skjótt, nú kappingin bara er nakrar vikur burtur.
Tað tykist vera greitt, at Kevin Schindler fer ikki at halda fram í HB. Tað er nakað síðani, at tað varð boðað frá, at Sorin Anghel fer ikki at halda fram á Skála, sum í heyst vann uppflyting, og tað er óvist, hvussu tað verður í NSÍ. Har tók Bill Jacobsen um endan eftir ólavsøku. Hann hevði verið í starvi sum høvuðsungdómsmennari í felagnum, og í løtuni liggur tað í kortunum, at hann skal halda fram í tí starvinum, um hann ikki fer at halda fram í høvuðsvenjarastarvinum ella um hann ikki verður høvuðsvenjari onkra aðrastaðni.
Tað ljóðaði, at Pauli Poulsen skuldi taka við ábyrgdini á Skála, har hann áður hevur verið venjari, men nú sigst, at samband hevur verið við ungan danskan venjara.
Tað hevur ljóðað, at HB leitar eftir nýggjum venjara í Íslandi, men enn hevur einki alment verið at frætta um tað.
| Venjarar í 2022 | |||
| KÍ | Mikkjal K. Thomassen | ||
| Víkingur | Jóhan Petur Poulsen | ||
| NSÍ | |||
| B68 | Øssur Hansen | ||
| Skála | |||
| EB/Streymur | Jákup Martin Joensen | ||
| 07 Vestur | Magnus Powell | ||
| HB | |||
| B36 | Dan Brimsvík | ||
| AB | Sámal Erik Hentze | ||
Nakrir venjarar, ið áður hava vant feløg, sum í 2022 eru í bestu deildini, og sum nú ikki eru høvuðsvenjarar í bestu deildini
Sorin Anghel hevur verið venjari í AB og á Skála.
Heðin Askham hevur verið venjari í HB, B36, EB/Streymi, NSÍ og 07 Vestur. Segði í summar venjarastarvið í 07 Vestur frá sær.
Jákup á Borg hevur verið venjari í B36 og bar seg undan, tá ið tað í summar varð heitt á hann um at taka starvið í NSÍ á seg.
Sigfríður Clementsen hevur verið venjari í B36, AB, EB/Streymi, HB og Víkingi. Hann er nú fótbóltsmennari í FSF.
Jan C. Dam hevur verið venjari í HB. Nú er hann venjari hjá næstbesta liðnum í EB/Streymi, sum í heyst misti plássið í næstbestu deildini.
Albert Ellefsen hevur verið venjari í FS Vágar og HB. Hann hevur júst tikið við sum venjari hjá 07 Vestur kvinnum í bestu deildini.
Bill Jacobsen hevur verið venjari í B68, AB og á Skála, og í heyst tók hann um endan í NSÍ, har hann framvegis er sáttmálabundin sum ungdómsmennari.
Jóannes Jakobsen hevur verið venjari í HB, KÍ, B68, B36 og AB. Nú er hann høvuðsungdómsvenjari í EB/Streymi.
Eyðun Klakstein hevur verið venjari í KÍ, B36, Skála og Víkingi. Fæst við so mangt annað enn fótbólt og er U-17 landsliðsvenjari.
Jens Martin Knudsen hevði í 2020 ábyrgdina av NSÍ í nøkrum dystum. Var í 2021, sum hann so ofta hevur verið, hjálparvenjari.
Abraham Løkin hevur verið venjari hjá NSÍ.
Jákup Mikkelsen hevur verið venjari í KÍ og ÍF.
Trygvi Mortensen hevur verið venjari í NSÍ, EB/Streymi, B68, AB og 07 Vestur.
Jógvan Martin Olsen hevur verið venjari í NSÍ, Víkingi og B68. Hann er nú fótbóltsmennari í FSF.
Pauli Poulsen hevur verið venjari á Skála, NSÍ, B68 og 07 Vestur.
