Í gjár gjørdist greitt at Víkingur skal møta Trepca 89 úr Kosovo í fyrsta undanumfari av Champions League kappingini, sum verður spælt í næstum.
Talan er um fyrstu ferðina at Trepca 89 úr Kosovo luttekur í europeiskum fótbólti, og ógvuliga soltið er av upplýsingum um liðið frá Kosovo á alnótini.
Men helst er talan um rímiliga sterkt mótstøðulið. Í øllum førum spældi Trepca 89 í gjárkvøldið venjingardyst móti rumenska felagnum, Astra Giurgiu, sum Trepca 89 vann 4-2. Astra Giurgiu endaði farna kappingarár sum nummar trý í bestu rumensku deildini.
Sostatt er nógv ið bendir á, at mótstøðan hjá Víkingi í Champions League verður í sterkara endanum.
