Ímynda tær, at tú sum barn ert til ein føðingardag. Borðið er fult av góðum mati sum lasagnu og lagkaku - men tú mást bara ikki eta tað, tí ein sjúka forðar tær í tí.
Hetta er veruleikin hjá teimum, sum hava serligu sjúkuna PKU (Phenylketonuria). Talan er um eina stoffskiftissjúku, sum ger, at mann ikki kann eta proteinir.
Hjúnini Tóra og Hans Toftegaard úr Fuglafirði eiga fimm døtur, og tríggjar av teimum hava arvaligu sjúkuna. Í nýggjasta Sosialinum er ein longri samrøða við tey um, hvussu hetta ávirkar gerandisdagin hjá familjuni.
– Tá tann elsta fekk tað staðfest, hugsaðu vit, at tað var gott, at tað bara var PKU og ikki okkurt verri. Men tá nummar tvey og nummar trý eisini høvdu sjúkuna, hugsaðu vit, at tað var í so nógv. Tí tá vistu vit jú frá royndum, hvussu nógv mann skal ígjøgnum, sigur Tóra Toftegaard.
Les longri samrøðu við familjuna í nýggjasta Sosialinum - samrøðan er í innlegginum, sum kallast Vikuskifti.
