Álvarsliga ferðsluóhappið í Hvalvík seinnapartin í dag, var ikki tað einasta ferðsluóhappið í dag. Men hóast tað var álvarsligt, sluppu tey fýra fólkini, sum vóru í bilunum væl, tá ið ein betongbilur og ein persónbilur stoyttu saman í Hvalvík.
Báðir bilarnir fóru útav og betongbilurin koppaði.
Tvey fólk vóru í hvørjum vilin, eitt vaksið fólk og eitt barn, sigur løgreglan.
Tað eina fólkið í persónbilinum mátti skerast leyst og tey vóru síðani øll fýra koyrd í sjúkrabili á Landssjúkrahúsið.
Men tey eru sloppin væl og onkur teirra eru longu útskrivað aftur, men onkur skal liggja í nátt til eygleiðingar.
Løgreglan veit ikki, hví óhappið hendi, men bilarnir koyrdu ímóti hvørjum øðrum, tá ið teir stoyttu saman.
Í sambandi við óhappið varð neyðugt at stongja vegin í fleiri tímar, tí tað var nógv olja og sement á vegnum, sum mátti reinsast burtur og so skuldi betongbilurin eisini fáast upp aftur.
Úrslitið av tí vóru endaleysar bíðirøðir av bilum báðu megin, men nú er so opið aftur.
Men hetta var ikki einasta óhapp í dag, tí stutt eftir óhappið í Hvalvík, fór ein bilur útav beint norðanfyri munnan í Kollafjarðartunlinum og ein bilur fór eisini útav beint sunnanfyri Hvalvík.
Í hesum báðum førum, vóru tað bara bilarnir, sum fingu skaða.
Myndina hevur Álvur Haraldsen tikið av ferðsluóhappinum í Hvalvík seinnapartin.
