Alberto Contador skuldi vísa øllum, at hann var ein av avbjóðarunum til samanlagda sigurin í Tour de France. 10. teinurin, við fleiri brøttum mótbrekkum, var pallurin, hann skuldi vísa seg framm á.
So varð ikki. Eftir góðar 70 kilometrar datt Alberto Contador í eini undanbrekku og meiddi seg illa. Tað sigst, at súkklan klovnaði. Hann royndi at halda áframm, men gott og væl 20 kilometrar seinni mátti hann geva skarvin yvir. Læknakanningar vístu, at Alberto Contador hevur brotið skinnabeinið og má skurðviðgerast.
Joaquim Rodriguez setti dám á teinin og varð við í einum broti meginpartin av degnum. Fimm kilometrar frá mállinjuni fór hann frá Michal Kwiatkowski, ið hevði fylgt honnum allan dagin, og nú sá út til at Rodriguez fór at vinna.
Men 2,6 kilometrar frá mállinjuni gjørdi tó Vincenzo Nibali bart. Hann fór frá sínum fylgisveinum, millum øðrum argum kappingarneytum sum Richie Porte, Tejay van Garderen og Alejandro Valverde, og setti ferð á. Góðan kilometur frá málinum, hevði hann megnað at innheinta Rodriguez, og hálvan kilometur seinni segði hann takk fyri fylgið, og stakk av frá honum eisini og súkklaði einsamallur um málstrikuna.
Vincenzo Nibali endurvann gulu troyggjuna og er gott og væl hálvttriðja minutt framman fyri Richie Porte á øðrum plássi. Alejandro Valverde er á triðja plássi.
Vincenzo Nibali er nú stóri favoritturin at vinna Tour de France. Chris Froome og Alberto Contador eru givnir og Alejandro Valverde tykist ikki megna at fylgja Nibali. Men onkrir serfrøðingar vilja vera við, at so lætt er tað ikki. Sagt verður, at av tí at so nógvir av favorittunum eru falnir, eru fleiri aðrir, ið nú halda seg sjálvar hava møguleika at vinna, og tí fara at leggja seg eftir júst tí.
11. teinur: Besançon til Oyonax, 187,5 km
Týsdagur er hvílidagur, men mikudagin skulu súkklararnir upp á súkklurnar aftur. Tá stendur 11. teinur á skránni. Súkklararnir byrja kl 11.50, men TV2 byrjar sína sending kl 12.15. Vinnarin væntast á mál umleið kl. 16.15.
Teinurin byrjar á sløttum, og onkrar minni mótbrekkur eru fyrstu 100 kilometrarnar. Men seinastu 50 kilometrarnir eru í fjallalendi, við trimum 3. flokka mótbrekkum og einari 4. flokka. Tað er ikki ein serliga avbjóðandi teinur, men tó so, tað er skjótt at missa nógva og dýrabara tíð í tílíkum lendi.
