Fyrrverandi bretski forsætisráðharrin Tony Blair sigur nú, at hann hevði ikki sagt nei, um hann fekk ein møguleika afturat at røkja embætið sum bretskur stjórnarleiðari.
Blair ásannar tó, at tað er ikki serliga sannlíkt, at hann kann venda aftur til tað embætið, sum hann fór úr í 2007, tá Gordon Brown tók við. Hinvegin sigur hann seg hava lært nógv hesi fimm árini síðani, og at hesar royndirnar høvdu komið honum til góðar, hevði hann komið aftur í embætið.
Um orsøkina til at hann gjørdi av at leggja frá sær í 2007 sigur Tony Blair, at hann hevði ikki fulla undirtøku inni í flokkinum tá, og at flokkurin hevði dottið sundur, hevði hann ikki stungið í sekkin.
